Isabel Oli nangorog sa hawkanay

Nangorog ang maanyag nga Sugbuanon nga si Isabel Oli atol sa iyang kissing scenes kauban ang kaliwat usab og taga Sugbu nga si Richard Guttierrez.

Ang duruha maoy loveteam sa nagkakusog ug nagkasikat nga telepantaserye sa GMA-7 ang "Sugo" busa dili malikayan nga duna silay kissing scenes matag karon og unya.

Suma pa nga sa unang higayon nga I-shoot na ang ilang panaghawkanay nagkurog kurog si Isabel Oli hinungdan nga naglibog ang production staff kong nadutlan ba ang dalaga o tinood nga nakuyawan.

Sa katapusan natino sa production staff nga nahadlok gyud diay si Isabel gumikan kay konserbatibo ang mga ginikanan niini nga nagbase na karon sa nasud sa Singapore.

Matud pa nga mismong si Direk Lore Reyes ug ang executive producer sa nahisgutang pantaserye ang nananghid sa mga ginikanan sa dalaga aron tugtan kini nga makighawok kang Richard.

Si Isabel Oli kansang tinood nga ngalan Olivia Daytia usa sa mga in-demand ramp models dinhi sa Sugbu ug nanimpad didto sa kaulohan mga duha na ka tuig ang nilabay.

Una siyang mipukaw og atensyon pinaagi sa usa ka commercial alang sa usa ka fastfood chain diin nakauban niya ang hunk nga si Piolo Pascual.

Human niadto wala nay hunong sa pagkatkat sa ang-ang sa kalampusan sa kalibutan sa arte ang dalaga kinsa garbo sa mga Sugbuanon karon.