Vic Sotto naikug ug nirespeto

Tungod sa kaikog gibakwi sa komedyante nga si Vic Sotto ang iyang deklarasyon kaniadto nga maka usa ra sa usa ka tuig siya mohimo og pelikula.

Matud ni Vic dili siya makaako nga mobalibad kang mother Lily ug Tony Tuviera mga producers kinsa suod ug girespeto niya nga mga higala hinungdan nga gihimo niya ang iyang latest movie ang "Ispiritista".

Suma pa ni Vic daghan na sila og pinagsamahan ni mother Lily tungod sa kataas na sa listahan sa mga pelikula nga iyang nagama ubos sa Regal gawas pa nga suod usab sila nga managhigala sa nahisgutang producer.

Sa habig usab ni Tuviera matud ni Vic dugay na usab sila nga nagkauban sa mga tv og movie projects hinungdan nga nitando siya sa maong offer.

Ipasalida na sunod semana ang "Ispiritista" diin leading lady ni Vic ang maanyag nga si Cindy Kurleto lakip usab ang child wonder nga si BJ Forbes o mas naila nga "Tolits" sa usa ka commercial sa sabon panglaba.

Pagdayeg ang gipalanog ni Vic alang kang "Tolits" gumikan kay matud pa niya dili angayang tawgon nga child actor ang naulahi kundili usa na gyud ka maayong artista tungod kay maayo kining moarte gawas nga dali ra makasabot og instructions.