Anne Curtis na ang Dyesebel

Hanap na ang tsansa ni Cindy Kurleto nga mahimong Dyesebel gumikan kay ang misibaw karon nga taho mao nga si Anne Curtis na maoy napili sa Viva Films alang sa maong role.

Apan sa higayon nga sugdan na kini paggaling dili alang sa big screen kundili sa abs-cbn isip hulip sa "Kampanerang Kuba" diin si Anne usab ang bida.

Ang "Kuba" ni Anne gikatakdang tapuson na sa dili pa ang Pebrero sunod tuig diin ang Dyesebel isip maoy hulip co-produce sa abs-cbn og Viva Films.

Ang Viva Films maoy dunay copy rights alang sa Dyesebel nga obra maestro ni Mars Ravelo kinsa mao usay nisuwat sa "Darna" nga nihataw karon sa GMA-7 diin bida si Angel Locsin.

Ang maong estorya gikatakda nga hatagan og kinabuhi ni Cindy kinsa under contract sa Viva og mao untay revival human kini ipasalida nga bida si Charlene Gonzales pipila na katuig ang nilabay.

Niadtong panahona, hataw ang "Marina" ni Claudine Barreto busa gihikling lang una sa Viva ang Dyesebel sa kabalaka nga mo-flog kini sa takilya.

Sa Anne dihang nahinabi sa Banat Entertainment niadtong Nobyembre niangkon nga ang Dyesebel maoy iyang dream role gumikan sa kanindot sa estorya niini diin andam siya nga mohatag og kinabuhi sa maong estorya basta walay breast exposure.