Kandidata sa Freeman napiling best muse

Ang 18-anyos nga Filipina Canadian nga si Karla Henry maoy napiling best muse sa pagbukas sa 2005 Tri-media Olympics kagahapon didto sa Cebu Coliseum.

Si Henry kinsa sakop sa A.D Models Philippines nga giduma sa sikat nga designer nga si Dexter Alazas maoy representante sa The Freeman/ Banat News contingent.

Ang maanyag nga dalagita nga dunay gitas-on nga 5'71/2 usa sa labing in-demand nga models karon sa Sugbo kong print ads ingon man corporate shows ang hisgutan.

Guapa, hamis og kutis ingon man dunay makabibihag nga pahiyom, si Henry mipildi sa mga representante nga naggikan sa Sun Star Daily ug Sky cable.

Gawas sa pagkahimo niya nga Miss Tri-media Olympics 2005, si Karla mao karon ang kasamtangan nga Glamour Girl sa Casino Filipino sa Waterfront Mactan ingon man nalakip usab siya sa Top 10 sa Search for Miss Hawaiian Tropics nga gipahigayon didto sa kaulohan ning bag-o lang.

Niadtong Mayo ning tuiga, si Henry kinsa tinun-an sa kursong Turismo sa University of Cebu napiling 2nd runner up sa prestiyosong Miss Mandaue beauty pageant.