Sa usa sa mga rally sa oposisyon didto sa kauluhan gipahayag ni Reyes nga angay I-boycott si Jolina gumikan kay kaalyado kini sa Malacanang.
Ang amahan ni Jolens nga si Mr. Jun Magdangal sa report sa Startalk niadtong Sabado namahayag nga naglibog sila nganong namahayag ug ingon niadto si Reyes nga unta kanunay man kini niyang daygon sa higayon nga magkita sila.
Nagkanayon si Mr. Magdangal nga trabaho lang ang kalambigitan ni Jolina isip host sa television magazine show nga "Ang Pangulo" og walay labot ang politika niini.
Suma pa ni Mr. Magdangal kanunay nga mamahayag si Reyes nga sulondon nga pagkabata si Jolina gumikan kay wala kini maduhig sa kontrobersya.
Si Reyes usa sa mga kaabin sa oposisyon kinsa hugtanon nga nanawagan sa pagpakanaug kang Presidente Gloria Arroyo sa pangatungdanan.