Dennis Trillo nanghimakak

Gipanghimakak sa kampo ni Dennis Trillo ang intriga nga gibalibaran niini ang usa ka digital movie kay dili niya buot makauban ang hunk nga si Alfred Vargas.

Naturalmente, niulbo ang kaspa ni Lolit Solis human nabati ang maong pamahayag tungod kay feeling niya nakamenos si Dennis kang Alfred kinsa usa sa iyang mga talents.

Apan matud sa kampo ni Dennis miscommunication lang ang nahitabo gumikan kay ang tinuod gibalibaran sa aktor ang maong pelikula gumikan kay papel sa usa ka bayot unta ang iyang dad-on.

Nagkanayon ang kampo ni Dennis sa wala pa ang maong project, dunay gi-offer ang regal sa aktor nga usa usab ka pelikula apan ila kining gibalibaran tungod kay gay role usab ang dad-on unta sa aktor.

Si Dennis nagsugod isip miyembro sa Star Circle sa ABS-CBN apan mas mihumot ang iyang ngalan human mitapon sa nataran sa GMA-7 mga duha na katuig ang nilabay ug nalakip sa pantaseryeng Mulawin.

Mas naila siya human mihakot og best actor og best supporting actor awards ning bag-o lang pinaagi sa pelikulang "Aiste Masu" diin papel sa usa ka bayot ang iyang gidala nga nahimong hinigugma sa usa ka sundawong hapon nga gihatagag kinabuhi ni Jay Manalo.