Reggie Curley naninguha usab kang Ara Mina

Dili lang diay si Polo Ravales ang dunay espesyal nga pagbati kang Ara Mina sa pagkakaron kundili hasta usab ang model nga si Reggie Curley kinsa lakip sa mga bituon sa pelikulang Pusang Gala.

Apan giingon nga mas dako og tsansa si Polo gumikan kay kanunay silang manuroy ni Ara tungod kay susama sila og mga barkada.

Samtang duna usay mga higayon nga sila rang duruha ang magkuyog panahon sa work-out sa usa sa labing inila nga gym didto sa kaulohan.

Si Reggie sakop sa all male group nga barako boys nga naglangkub usab kanila ni Jay Manalo, Christian Vasquez, Luis Alandy, Paolo Paraiso ug Carlo Maceda.

Samtang kahinumduman nga atol sa pagbisita sa pipila ka cast sa pantaseryeng Encantadia dinhi sa Sugbu gipamahayag ni Polo nga nakagusto siya kang Ara og suod silang duruha.

Apan matud pa niya dili pa karon ang tukmang panahon nga sila mag-uyab gumikan kay busy sila sa ilang tagsa tagsa ka trabaho sa showbiz.