Irma Adlawan: Bisdak

Kaliwat og taga Minglanilla ang "rayna sa digital movies" nga si Irma Adlawan gumikan kay ang iyang amahan lumad sa nahisgutang lungsod.

Si Irma kinsa gipaabot sa mga kritiko nga makaangkon og best actress award gumikan sa maayong arte nga iyang gipakita sa lilas nga "Mga Pusang Gala", nitug-an nga wala siya'y plano nga mag-artista kaniadto.

" I just love to act. I did not expect that I will get here. Nahihiya ako because I'm not used to being interviewed on tv," suma pa ni Irma kinsa nahinabi sa Cebu press niadtong Sabado didto sa SM City.

Bata pa lang si Irma dihang nibalhin pagpuyo ngadto sa kaulohan ang ilang pamilya busa naghinamhinam siya nga mahimamat ang iyang mga kaparyentihan sa Minglanilla.

Hinoon nasayod siya nga dili pa kini mahimo sa pagkakaron gumikan kay daghan pa siya og commitments sa showbiz apan matud pa niya iyang planohon og maayo ang maong adlaw.

Si Irma nagsugod isip theater actress sa dihang nagtungha pa siya kaniadto sa UP Diliman. Ang beteranong aktor nga si Ricky Davao kinsa suod niyang higala maoy nag-aghat kaniya nga mag-artista pinaagi sa mga shows sa abs-cbn nga gidirehi sa nauwahi kaniadto.