Wala mawad-i sa paglaum si Raki nga pag-abot sa hustong higayon maangkon ra niya ang iyang gipangandoy nga kalampusan sa natad sa showbiz subay sa unsay gilatid sa Dios alang kaniya.
"I continue to pray for God's guidance and strength. I hold on to my faith in Him. I know God has prepared something for me, maybe wala pa ron. With much hope in my heart I know it will come. His will be done," pong ni Raki sa iyang email ngadto sa Banat Entertainment ning bag-o lang.
Si Raki mao ang Ultimate Born Diva sa gihimo nga bangga sa abs-cbn sa nakalabay nga tuig diin gawas sa cash prize nga iyang nadawat nakaangkon usab siya og kahigayonan nga makagama og kaugalingong album.
Apan daw naigo sa mangtas nga pamolitika sa kaugalingong tugkaran sa iyang mother studio si Raki gumikan kay tag-sa nalang kaayo siyang makita sa telebisyon dili sama sa ubang mga singing contest winners sa Kapamilya network.
Hinoon gumikan kay dili man ikalimod nga maayo gyud nga mokanta ang Ultimate Born Diva misubang ra gihapon ang bitoon ni Raki sa natad sa teatro.
Dili basta-basta nga pagdayeg ang naangkon ni Raki gumikan sa performance nga iyang gipakita sa stage play nga "Once on this Island" didto sa kaulohan diin gi-produce kini sa Little Boy Productions ning bag-o lang.
Karong Agosto 27 sa alas syete sa gabii ipasundayag pagbalik ang maong play dinhi sa Sugbu diha sa SM Theater two diin makauban pagbalik ni Raki ang mga banggiitan nga theater actors sama nilang Bituin Escalante, Michael Williams, Menchu Lauchengco og Jett Pangan sa direksyon ni Bart Guingona.