Walay TV coverage sa kasal ni Kris ug James - kon madayon

Kon ugaling mahinayon gyod ang kasal nila ni Kris Aquino ug James Yap, dili gyod gusto si James nga dunay TV coverage. Giprangkahan na ni James ang executive producer sa Star Cinema nga si Malou Santos nga dili gyod siya gusto.

Pero ambot mahitabo ba nga way TV coverage nga matud pa, ang kinabuhi ni Kris, sama sa usa ka teleserye nga kinahanglang mabulokon gyod ang ending, ug kon way TV coverage, sama ra kono nga nag-brown out manday ending na.

Misamot ang pagdumili ni James sa dihang giingnan siya nga bayran sila sa ABS-CBN kay daghan man sad ang commercial unya nga mosulod sa higayong ipasundayag na kini sa TV ug matud pa ni James, dili gyod siya gustong hisgotan ang kwarta. Nasayod man god si James nga minilyon ang kita ni Kris itandi sa iyang kita nga karong tuiga, linibo pa lang. Hinuon, modako kini matag tuig og moabot usab og P11.7 million sulod sa tulo ka tuig.

Si Kris dul-an sa P1 million matag buwan sa ABS-CBN lang, wa pay labot sa iyang mga pelikula ug sa mga produkto nga iyang gi-endorse.

May tulo pa ka pelikula siyang himoon sa Star Cinema nga dul-an sa milyon usab ang bayad, wa pay labot sa Regal.