Dubbed shows sa GMA-7 gihunong kay wa mo-click

Ang Korean novela nga Beautiful Days nga makita matag alas-onse sa buntag sa Kapuso channel mao nalang ang nagpabilin nga binisaya nga show sukad niadtong Lunes.

Kini human nidesisyon ang management nga hunongon na ang ubang tagalog shows nga gi dub ngadto sa binisaya agig pagsimpatiya og pagrespeto sa pagsupak sa mayoreya sa mga tumatan-aw nga nagpaluyo sa GMA-7.

Si Anna Marie Tan, station manager sa GMA-7 Cebu nibutyag sa Banat Entertainment ning bag-o lang nga nipakanaog sa maong desisyon ang management gumikan sa kadaghan sa mga nireklamo diin kasagaran mga ginikanan.

"The rating went up so dili mi makahunong dayon. But daghan gyud kaayo ang nireklamo so we decided to listen to them. It was our way of bringing the shows closer to them but dili pa ready ang mga Cebuanos so we respect them," pasabot pa ni Tan.

Suma pa niya nga ang mga ginikanan nireklamo gumikan kay matud pa pinaagi sa maong mga shows dili na nila kinahanglan nga tudluan ang ilang mga anak og tinagalog kay makakat-on naman kini pinaagi sa pagtan-aw lang.

Nagkanayon si Tan nga mapasalamaton ra usab siya sa reaksyon nga gipadangat sa mga Sugbuanon gumikan kay namatud-an nila nga daghan na gyud diay sila og tumatan-aw dinhi sa Sugbu.

" It was a validation sad nga daghan nata og viewers dinhi kay grabe kadaghan gyud ang manawag kada-adlaw, as in hundreds gyud. Mahurot nalang akong oras og tinubag sa mga reklamo. Amo man gyud nang giklaro nga dili magbalik-balik ang callers and we found out nga hapit tanang barangay sa city represented gyud," nidugang si Tan.

Ang mga dubbed shows nga gibalik na sa naandan mao ang Huwag Kukurap, Idol ko si Kap, Lovely Day, Kay Susan Tayo, Love to love, Lagot Ka, Bahay Mo Ba To og Magpakailanman.

Ang maong mga shows gibinisaya sulod sa duha ka bulan diin daghan ang nireklamo kay matud pa insulto kini sa mga Sugbuanon nga makamaong motabi og makasabot kaayo sa pinulungang Tagalog.

Suma pa ni Tan nga magpabilin ang Beautiful Days sa binisaya nga lengguahe gumikan kay duna na kini kaugalingong sumusunod nga permi nang mag-atang matag buntag.