Hollywood movie ni Cesar hapit na gyud ipasalida

Human sa dugayng panahon ang Hollywood movie ni Cesar Montano, ang "The Great Raid," ipasalida na sa mga kasinehan sa Pinas. Ang world premiere Philippines niini gi-schedule na unya sa Aug. 10.

Kining salidaha didto sa Australia gi-shooting. Estorya kini about the great raid didto sa Cabanatuan, diin gi-liberate sa mga sundawong Kano ug girelyang Pinoy ang kapin sa 500 ka mga prisoners of war (Kano ug Pinoy).

Si Cesar nagdala sa papel ni Capt. Juan Pajota, usa ka girelyero nga ni-guide sa mga Kano ngadto sa lugar diin gitanggong ang mga POWs.

* * *

Kauban ni Cesar sa "The Great Raid" mao sila si Benjamin Bratt, Joseph Fiennes, James Franco ug Connie Nielsen.

Ang maong pelikula is based on a true story. Gawas ni Cesar naa pay ubang mga Pinoy movie stars sa salida.

* * *

Ang World premier sa "The Great Raid" didto sa Washington, D.C. di pa lang dugay nakaangkon og pagdayeg sa mga kritiko ug mga dagkong opisyal sa US government, apil na gani si Sen. Hillary Clinton.

Si Cesar personal nga nitambong sa maong premier ug personal usab siya nga gisultian ni Senador Clinton sa iyang pagdayeg sa salida ug sa estorya sa kooperasyon sa US ug RP niadtong panahon sa gubat.

* * *

Gitininuod gyud ni boxing great Manny Pacquiao ang iyang acting sa "Lisensyadong Kamao" sa Violett Films. Suma pa sa taho nga atong nadawat gikan sa usa ka movie critic didto sa Manila, gibuga ni Manny ang tanan niyang nahibaw-an sa acting aron mailhan sab siya nga good actor dili lang isip good boxer.

Mga leading ladies ni Manny sa "Lisensyadong Kamao" mao ang duha sa labing inila nga sexy stars nga mao sila si Aubrey Miles ug Juliana Palermo.