Ang batan-ong pangulo sa FQ

Human sa among interview kang Jericho Rosales, gisunod dayon namo sa pag-interview si Mam Doyee Tactacan Tumpalan, ang chief executive officer kon CEO ug pangulo sa First Quadrant niadtong Hunyo 8 sa gabii, didto sa usa ka gamay nga lawak sa First Convention Center diin gilain gyod alang sa mga sakop sa media nga gustong mo-interview nilang Jericho.

Wa pa makailis si Mam Doyee. Nagsul-ob pa siya sa iyang mestiza dress ug sa tiara niyang gika-ibgan sa host, ug sa mahalon kaayong ariyos nga migilaw pag-ayo.

Layo ra kaayo ang iyang hitsura sa personal kay sa iyang mga retrato. May pagka matured na siya sa iyang mga hulagway apan batan-on kaayong tan-awon sa personal nga is-is kaayo ang mga panit (pangulo god sa First Quadrant). Matud niya, 33 na ang iyang panuigon ug duha na'y iyang anak. Giingnan nako siyang na-impressed kaayo ko niya nga mikaylap na ang First Quadrant halos sa tibook kalibutan ug misamot na ka daghan ang mga business partners sama sa Globe Telecom, San Miguel Corporation, Philips Products ug uban pa ug matud niya, "honesty ... kung honest kang makipag-deal sa mga kaibigan, pagkatiwalaan ka."

Miingon usab siya nga gikuha nila si Jericho Rosales isip endorser kay sama sa First Quadrant, si Jericho industrious ug gikan sa usa ka "humble beginnings" ug wa mausab ang batasan. Kriss Relatado