Nahinaykan kay dila gipaak

CEBU, Philippines — Nadakpan na sa kapulisan sa Mambaling Police Station 11 Cebu City Police Office(CCPO) ang prime suspect sa pagpatay ug paglabay sa 22-anyos nga dalaga nga si Neca Denise Lagria sa South Road Properties niadtong nakalabay nga adlaw’ng Martes.

Ang suspek mao si Godofredo Brufal, 35 anyos, taga Barangay Sab-a, Lungsod sa San Remigio diin siya nadakpan kagahapon sa ala -una sa kaadlawon human siya maoy gitudlo sa pag-umangkong si Jason Cullamat nga maoy utok sa pagpatay kang Lagria.

Si Cullamat gimaoy unang gidakop sa kapolisan niadtong Miyerkules sa hapon samtang nagmaneho sa usa ka multicab diha sa lungsod sa Consolacion.

Ang maong multicab maoy gitumbok nga gikargahan sa biktima sa dihang gilabay ang lawas niini diha sa SRP.

 Apan nihimakak siya niini kay matud niya nga ang uyoang si Brufal maoy namasahero niadtong adlaw nga Martes, Nobiyembre 19, 2024 nga samang adlaw sa paglabay sa lawas sa biktima.

Matud ni Police Major Efren Diaz Jr., hepe sa Mambaling Police Station 11 nakatabang ang mga CCTV footages sa pagkaila sa suspetado.

Na-recover sab gikan kang Blufar ang cellphone sa biktima samtang ang sapatos sa biktima nga gigamit niya padung trabaho na-recover diha sa garahian sa multicab.

"Even though ang case ani is closed na, mag-conduct ta og debriefing sa suspect para makakuha ta og information kung giunsa niya ning biktima," sigon ni Diaz.

Nasayran sab nga si Brufal dunay walo ka kaso ug usa na niini ang Acts of Lasciviousness.  Nabun-og ang nawong sa suspetsado gumikan sa pagdali-dali niini og ikyas.

Giangkon sa suspetsado ang krimen nga siya maoy driver sa multicab nga gisakyan sa biktima dihang gipasakay kini sa amahan sa dalaga diha sa eskina sa Barangay Yati, Lungsod sa Liloan niadtong Martes sa kaadlawon, Nobiyembre 19, 2024.

Ang biktima naa nilingkod sa frontseat tupad sa driver ug padulong unta kini sa trabahoan kay naa sila'y meeting sa dakbayan sa Mandaue.

Posible matud pa nga nakatulog ang biktima ug giangkon sa suspetsado nga iyahang gihagkan ang biktima apan nisukol kini.

Matud niini gipaak sa dalaga ang iyahang dila mao nga nahinaykan niya kini og tuok hangtod namatay. Ang suspetsado ug ang pamilya sa biktima nag-abot sa Cebu City Police Office.

Emosyonal ang pamilya sa biktima dihang ilahang gikompranta ang suspek.  Si Neca, kinamanghuran sa upat ka mga magsuong pulos babaye.

Si Blufar miingon nga di niya intensyon nga patyon si Neca apan iyaha kining nahinaykan tungod sa kasakit sa iyang dila nga pulong niini “naputol.”

Gibutyag niya nga sa usa ka awaaw nga dapit sa Barangay Subangdaku, dakbayan sa Mandaue niya napatay si Neca.

Human mapatay ang biktima midiretso ang suspek sa SRP ug didto gilabay ang biktima.  Ang dugo sab nga nakita sa multicab gingkon sa suspek nga iyaha to tungod sa iyang dila nga naputol. 

Ang mga pamilya sa biktima nagpasalamat sa paspas nga aksyon sa kapulisan ug bisan sa ilang kaligutgot ilahang gitugyan sa Ginoo ang tanan.

Si Police Colonel Antonietto Cañete, City Director sa CCPO miingon nga sulbad na ang maong kaso ug ipasaka na nila ang kaso sa mosunod nga mga adlaw.

"There are several possibilities of cases he might be facing before the prosecutor, first rape with homicide depending on the result of SOCO team which I have to receive yet; second there might be crime of homicide and theft kung patay na gikuha niya ang cellphone or robbery with homicide kung buhay pa gikuha niya cellphone with intimidation of force or  violence against the victim so depende pa na sa atoang investigation nga pormal gyud kay he admitted and I instructed to seek an independent and competent counsel to advise him for the execution of extrajudicial confession," asoy ni Cañete.  Samtang si Cebu City Mayor Raymond Alvin Garcia personal nga mitunol og hinabang sa pamilya sa biktima.

Hatagan sab niya og commendation ang kapulisan sa Siyudad sa Sugbo partikular na ang Mambaling Police Station tungod sa paspas nila nga pagsulbad sa kaso.  IBM BANAT NEWS