Amang ang gugma ni Boyaks

“Nia ka diay Boyaks, nahasuroy man,” timbaya ni nang Ines sa ulitawong anak ni kumare Peryang niya.

 â€œAda, may tuyo unta ko sa dalagang anak nimo, makigpanimba ko niya kay adlaw’ng Domingo man ron,” tubag ni Boyaks samtang naghikap-hikap sa iyang hinapay nga pinamadahan og ‘tancho’ nga pinalit sa iyang inahan sa lungsod.

“Aw sus, kana ra diay, hala dayon anaa diha si Inday Tekla sa ibabaw nagbasa og Banat News,” agda pa ni Ines samtang nagluto og putong balanghoy para snack ning sayong kahaponon.

Paghitangka ni Boyaks sa pultahan maoy iyang nakita si Inday Tekla nga mitimbaya kaniya.

“Dayon Boyaks, nahasuroy man,” Ug samtang nakalingkod na si Boyaks daw gilubok og alho ang iyang dughan.

Bag-ong ligo si Tekla ug gisinapid niini iyang buhok nga hinisoan og lana sa lubi nga maoy nakapanindot sa iyang buhok. Simple ug yano ra siyang pagka babaye sa ilang baryo hinungdan nga daghang ulitawo ang naninguha sa iyang gugma.

“Nagsige na man lang ka’g tutok nako Boyaks, mahilis baya ko ana,” sulti pa ni Tekla.

Nagkawot-kawot si Boyaks sa iyang ulo. Nangigham!.

“Sige na, ayaw’g ukon-ukon kun unsa may tuyo mo kanako,” sukna pa ni Tekla samtang gapaabot sa isulti sa iyang bisitang ulitawo nga may pagtan-aw ra ba unta siya sa hilom ning tawhana.

“A, kuan nakakita ka na ba sa salida ni Rudy Fernandez nga ‘Matimbang Pa Sa Dugo’? ... nindota salidaha oy! Kakita ko sa DVD tape nga dala ni Tatay Pangkoy gikan sa lungsod ug aksyon gyod todo-todo!” pamahayag ni Boyaks samtang nagtingsi kini.”

Ay da Boyaks, wala koy gana niana oy!, ang gusto nako rong panahona mao ang gugma sa usa ka lalaki nga magmahal nako sa tinuoray.”

Imbes mo diskarte si Boyaks lain na hinoon ang nanggawas sa baba niini. Mao tong nananghid na lang siya nga mopauli kay dili man gyod siya kasulti sa iyang gibating gugma ngadto kang Tekla.

Samtang naglakaw siya pauli sa ilaha, misantop sa iyang galamhan ang usa ka hunahuna.

“Maypa’g hangyoon ko si Nanay Peryang nga siya ang mangamoral ug mangulitawo para kanako kang Inday Tekla,” nakatuaw sa hilom si Boyaks.

Pag-abot niya sa ilang balay, gisultihan dayon niini ang iyang inahan.

“Hesus maryosep kanimo Boyaks! Ako pay papangulitawhon mo kang Inday Tekla nga anak ni Mare Ines? Dili na pwede! Unsa amang nang gugma mo? Dil ka kasulti? (Katapusan)