Mga pasalamat ug sipyat sa bagyong Yolanda

Daghan karon ang nag-ingon nga angay lamang nga pasalamatan ang tanan nga nakatampo sa pagtabang sa mga biktima sa super typhoon nga Yolanda nga maoy nakahatag kanila og dugang kalig-on ug nakapaluag sa ilang pag-antus ug nakahupay sa naghuot nilang galamhan tungod sa gibati nga kaguol nga nakamugna og sakit nga kasinatian.

Matud pa nila nga angay nga pasalamatan ang mga tigbalita nga naghatod og kasayuran nga maoy nahimong kahimanan sa pagtubag sa ubang kanasuran sa paghatod sa wala’y kinutoban nga hinabang nga nakahatag sa mga biktima og kalig-on dili lang sa ilang galamhan  kun dili sa hapit na unta mahagtos nilang paglaum.

Dugang nga angay pasalamatan mao ang tanang sektor sa atong katawhang Pilipinhon nga nagtampohay sa paghatod og hinabang ngadto sa mga biktima sa kabangis sa bagyong Yolanda nga mikusokuso sa Kabisay-an.

Ang mga media outlet sa print ug broadcast nga gawas sa ilang kaugalingong donasyon nga gitunol  sila usab ang nagsilbing instrumento  sa mga Sugboanon  nga nagkahiusa sa pagtampo sa pagtunol sa ilang hinabang nga nahatod gayod ngadto sa mga biktima nga hingtungdan.   

 Ang talagsaon nga gipakita nilang pagpakabana sa mga biktima sa bagyong Yolanda mao lamang ang buhing kamatuoran nga ang katawhang Pilipinhon nga bisan kun mabahinbahin pa ang politikanhong baroganan apan may kahigayonan pa gihapon nga magkahiusa sa pagtinabangay sa panahon sa kalisod nga masinati sa iyang kaigsoonan.

Nunot niini adunay nag-ingon nga kun adunay angay pasalamatan dili usab mahimo nga ato lamang ihiklin ang paglili sa mga sipyat sa pagkusokuso sa bagyong Yolanda sanglit mahimo man kining  giya aron kalikayan nga masubli pa sa mosunod pa nga mahitabong katalagman.

Sa pag-ila sa pipila lamang  nga gituohang mga sipyat dihang nahitabo ang bagyong Yolanda mao nga atol sa pagkusokuso sa bagyong Yolanda mao ang kakulang sa pagpasabot sa Philippine Atmospheric Geophysical and Astronomical Services Administration (Pagasa) sa “storm surge” nga nagpasabot sa pagdako sa dagat ug pagkamugna sa higanting mga balud sa bagyong Yolanda, ang ikaduha mao nga pagbaraw ni Presidente Benigno Aquino sa pagbanabana ni Chief Superintendent Elmer Soria nga gituohan niini nga  10,000  ka tawo ang namatay ug  iyang giingon nga nasubrahan ug nagdrama lang kay 2,500  ra iyang gituohan nga maoy hinungdan nga gitangtang kini sa katungdanan.

Ang  pagdakdak sa presidente sa iyang pagbasol ngadto sa mga local official sa dakbayan sa Tacloban nga wala makahimo sa pagpangandam ug nahimong inutil kini sa pagtubag sa ilang kaakohan sa katawhan sa panahon sa katalagman nga maoy hinungdan nga dugay nga natagad ang pagpadala og hibanang nga nagbunga og mga pagsaway kang  Aquino sa international community.

Ang giingon sa presidente nga nasubrahan ang pagbanabana nga 10,000  ka tawo ang namatay nga biktima sa bagyong Yolanda sa dakbayan sa Tacloban kay alang kaniya nga   2,500 lamang  ang namatay nga biktima nga maoy nakaingon nga gihulipan sa katungdanan si  Region 8 PNP Director Elmer Soria tungod sa pagtuo nga gilak-ab ang pagbanabana.

Ang  gihimong pagbaraw ni Korina Sanchez sa tigbalita sa CNN nga si Anderson Cooper nga pagpadangat og mga lak-ab kaayong detalye sa iyang balita nga misangko na hinuon sa paghagit sa maong langyaw ngadto kang Korina sa pag-adto sa Tacloban sanglit sayon lamang kaniya ang pag-adto sa Tacloban City kay si Mar Roxas nga iyang bana mao man ang DILG secretary sa presidente ug daghan pa.