Nag-ani sa gipugas

Nilabad ang ulo ni Mr. Nestor Puldas usa ka dakong negosyante nga biyudo. Namatay og sayo iyang kapikas tungod sa konsomisyon. Kay bisyoso siya og babaye. Left and right iyang mga babaye. Kay kaya man niya. Nagbaha man iyang kuwarta sa kita sa mga negosyo. Karon siya na sab ang nakonsomisyon.

Ang iyang duha ka anak babaye nga puro minyo nag-awayan kay nag-ilog og lalaki. Gihatagan na niya’g daghang kuwarta iyang mga anak. Ug giapuran og mga negosyo. Ang ilang mga bana nga gikan sa pobreng pamilya, nanghantok lang. Under  nila ilang mga bana. Kay under, di kapalag kun manglaki sila. Magpakabutabungol lang ang mga bana.

Ang nakalabad pag-ayo sa ulo ni Mr. Puldas kay nabaniog na sa tibuok siyudad ang eskandalo nga namugna sa iyang mga anak. Nag-away kay nag-ilog og lalaki. Ang drayber ni Marisa nga kabit ra sab niya, giilog sa iyang manghod nga si Mildred. Naglinabnotay sa buhok ang managsoon. Napuno si Mr. Puldas sa mga pangutana sa mga higala o kasosyo sa negosyo.

“Unsa ka tinood ‘Tor? Unsa ka tinood, Nes? Unsa ka tinood Mr. Puldas? Nga imong mga anak nga puro minyo, nag-ilog og lalaki? Wa mabadlong sa mga bana? Yotot diay ang mga bana?”

Nakapanap-ong sa mga dunggan si Mr. Puldas. Daw moboto iyang dughan sa pagpinitik sa kasingkasing dihang nisaka iyang blood pressure.

Si Melchor nga kinamanghurang anak ni Mr. Puldas, ulitawo pa.  Apan duna nay pangasaw-onon. Naulaw sab kaayo siya sa mga tsismis sa eksandalo nga nasudlan sa iyang mga maguwang. Maayo modala og negosyo si Melchor. Siya ang nakapalambo sa mga negosyo sa iyang amahan.

Tungod sa maayong nahimo ni Melchor, siya ang gitagaan sa kinadak-ang bahin nga negosyo ug salapi sa iyang amahan. Nasuya ba kaha iyang mga igsoon babaye niya? Nga wa nila tarunga pagdumala ilang mga negosyo? Kanunay silang mangayo og abuno sa ilang amahan. Magdala man sila’g mga lalaki sa casino.

“Ang casino, way kabusogon. Bisa’g pila ka milyon salapi imong dalhon diha!” matud ni Melchor ngadto sa iyang mga maguwang babaye. Apan siya pa ang singkahan kun manambag sa mga igsoon.

Nisumbong si Mr. Puldas ngadtong Melchor mahitungod sa iyang labad sa ulo.

“Hunonga na nang imong bisyo sa babaye, Pa. Kay nag-ani ka na sa imong gipugas” pintok  nga pulong ni Melchor. Niduko iyang amahan. Ug naghinuktok pag-ayo. (Katapusan)