Anak nga nag-maoy natigbasan

CEBU, Philippines — Nalandig sa tambalanan ang usa ka anak human kini gitigbas sa iyahang amahan kay kini giingong hubog unya nag maoy diha sa Sitio Ipil-Ipil, Barangay Babag 2, Siyudad sa Sugbo kagahapon sa kadlawon.

Ang biktima mao si alyas Horace, 36, samtang ang suspect nga iyang amahan kay si alyas Norberto, 73, pulos residente sa Sitio Ipil-Ipil, Barangay Babag 2, Cebu City.

Sa imbestigasyon sa kapulisan nga ang biktima hubog nga niuli sa ilahang panimalay.  Sigon pa sa inahan sa biktima kun mahubog kini mag maoy gyud.

Adtong higayona pag-uli sa biktima nga hubog pugsanon niining giguba ang pultahan sa kwarto nilang magtiayon.

Ang amahan daan ng dunay sundang sa kwarto pang-proteksyon  kay magsige og bahad ang biktima ug anang tungora natigbasan gyud kini.

Matud pa sa inahan gibaharan na sa ilang anak ang amahan niini nga patyon  magsige sila og bangi kay bisyoso ang anak. Gitabang sa mga responders ang biktima nga naa karon sa tambalanan samtang ang suspect nabalhog sa prisuhan.

Na-recover sab ang sundang nga gigamit nga ang gjtas-on kay 20 inches.(CEBU NEWS)