Bagong traffic scheme sa Mandaue Andam na ipatuman

MANILA, Philippines — Gikatakdang ipatuman karong buwan sa Abril ang bag-ong traffic scheme sa intersection sa U.N. Avenue ug M.C. Briones Street nga nahimutang atubangan sa Pacific Mall sa siyudad sa Mandaue.

Kini ang nakompirmar human nihimo og inspection sa proyekto sila si assistant city administrator Architec Florentino Nimor uban sa pangulo sa Traffic Enforcement Agency of Mandaue (TEAM) nga si Hylle Retuya uban sa project supplier nga si Timothy Ong.

Suma pa ni Retuya nga mokabat sa P9milyones ang naggasto sa maong proyekto nga gitumong aron pagpaluag sa dagan sa trapiko sa maong lugar.

Nagpadayon karon ang road concreting ug isunod ang pag aspalto ug pagbutang sa mga lane sa karsada ug gipaabot nga mahuman sa ikatulong semana sa buwan sa Abril.

Nasayran ang orihinal nga target sa paghuman niini mao ang bulan sa Pebrero apan nakasinate og kalangay tungod sa mga pag-uwan.

Sa maong bag-ong traffic scheme ang mopaingon sa south himoon nga upat ka lanes, duha paingon sa Cebu City ug duha ang itagana alang sa mo left turn paingon sa Lapu-Lapu City.

Samtang ang mga sakyanan nga mopaingon sa norte nga bahin ang mogamit sa taytayan sa Butuanon River.                                                                                                                                                

Adunay ipahimutang nga mga signage sa unahan nga bahin sa matag intersection ug ipahimutang usab ang mga conrete barricades sa paghatag og giya sa mga motorista.

Kabahin usab sa proyekto mao ang pagpahimutang sa adaptive traffic lights sa maong dapit, kini pinaagi sa Smarts Lights nga giubanan sa mga camera nga ipahimutang sa ibabaw sa signal light.