Juris Doctor Program buksan sa CNU sa unang semester

CEBU, Philippines — Ang Cebu Normal University (CNU) motanyag sa Juris Doctor (JD) Program sugod sa unang semester sa academic year 2025-2026 human kini opisyal nga nakakuha og permit gikan sa Legal Education Board (LEB).

Atol sa press conference kagahapon, Marso 15, gibutyag ni University President Dr. Daniel Ariaso Sr., nga sugod Agosto 2025 opisyal na nga itanyag sa unibersidad ang JD Program alang sa mga nangandoy nga mahimong abogado.

Si Ariaso nagkanayon nga ang CNU maoy labing unang state university ug college sa Central Visayas nga mitanyag sa maong programa.

Matud niya ang pagdalit niining programa apil sa paningkamot sa iyang administrasyon sa pagpalapad ug pagpa-usbaw sa kapabilidad sa CNU sa pagtabang sa mga Sugbuanon ug sa mga batan-on sa Cebu Islands nga makab-ot ang ilang mga pangandoy pinaagi sa pagdugang og mga programa nga kapilian.

Target sa CNU ang makapa-enroll og labing menos 100 ka mga estudyante sa first year. Giklaro sa tunghaan nga dili sila modawat og mga transfer applicants.

Saysay usab ni Ariaso nga ubos sa regulasyon sa LEB, kinahanglan dunay labing menos 60 ka mga estudyante sa 1st year hangtod 4th year aron mapadayon ang programa.

Ang tuition fee kay nagkantidad og P1,000 kada unit ug adunay dugang P5,000 para sa miscellaneous fees. Sa kinatibuk-an, gibanabana nga moabot kini ngadto sa P20,000–P22,000 kada semester. Andam na usab ang pasilidad nga gamiton atol sa pagsugod sa klase karong umaabot Agosto. Adunay walo ka mga room, upat niini kay gamiton isip administrative offices ug upat para sa mga klase. (BANAT NEWS)