3 star players nilayasan ang UE?
MANILA, Philippines — Bangas na naman ang lineup ng University of the East sa nalalapit na pagbubukas ng UAAP Season 87 women’s volleyball tournament.
Ito ay matapos magsulputan ang kaliwa’t kanang ulat nang paglisan ng ilang key players ng Lady Warriors kabilang na si ace spiker Casiey Dongallo.
Maliban kay Dongallo, umalis na rin umano sina playmaker Kizzie Madriaga at spiker Jelai Gajero.
Walang pang kumpirmasyon ang tatlong players sa mga balita.
Subalit ayon sa ilang sources, lumipat ang tatlo sa University of the Philippines.
Malaking kawalan sina Dongallo, Madriaga at Gajero sa Lady Warriors.
Isa si Dongallo sa pinagkukunan ng lakas ng UE sa nakalipas na season kung saan nakalikom ito ng kabuuang 291 puntos sa Season 86.
Subalit hindi ito sapat para buhatin ang UE sa Final Four matapos magtapos ang kampanya ng Lady Warriors tangan ang 3-11 rekord.
Maaasahan din si Gajero sa opensa dahil sa mga pamatay nitong atake habang si Madriaga ang isa sa itinuturing na susunod sa yapak ng ilang mahuhusay na playmakers sa liga.
Kung matutuloy ang paglipat nina Dongallo, Madriaga at Gajero, sasailalim ito sa one-year residency bago makapaglaro suot ang Fighting Maroons jersey.
Napaulat na nasa UP coaching staff na si dating UE coach Obet Vital — ang mentor nina Dongallo, Madriaga at Gajero noong nasa juniors pa ito sa California Academy.
Dating coach ng UE si Vital subalit lumisan ito noong Disyembre.
- Latest
