Buhi pang impeachment
Nakaginhawa og luag ang mga tigpasiugda sa impeachment ni Bise Presidente Sara Duterte sa paghagsa sa planong kudeta batok ni Senate President Chiz Escudero. Kon nadayon pa, mabaraw ang mga paningkamot sa laktod nga pagsumiter sa Senado sa articles of impeachment nga dili na moagi sa House Justice Committee.
Nagduda ang grupo ni Senador Cynthia Villar, nga nangambisyon untang makahimo og kasaysayan isip labing unang babaye nga presidente sa Senado sa Pilipinas, nga duna silay kauban nga nagbudhi pinaagi sa pagbisto sa plano ngadto sa Malakanyang ug sa media.
* * *
Naigo ang plano sa pasidaan sa katiguwangan nga makabali ang sobrang pagdali-dali. Gikatahong gisugdan paglista ang mga senador nga motuboy ni Villar dihang gipasaka ang unang impeachment complaint batok ni Duterte sa Disyembre 2. Mas gihingusgan dihang gipasaka ang ikaduhang impeachment complaint sa Disyembre 5.
Gipasanginlan si Villar nga apurado kay dili lang pag-absuwelto ni Duterte ang ilang tuyo. Kon dili ang pagpabalik sab sa mas dako niyang budget sa 2025.
* * *
Gawas ni Escudero, nga gipasanginlan sa grupo ni Villar nga itoy ni First Lady Liza Araneta Marcos ug kabahin sa maniobra pagpalagpot ni Duterte sa puwesto, gusto sab nilang palagputon si Senador Grace Poe isip pangulo sa Senate Finance Committee.
Si Poe maoy ilang gibasol nga namugos sa P1.3 bilyones nga laslas sa budget ni Duterte ngadto na lang sa P733 milyones (nga kinopya ra sa kantidad nga giaprobahan sa House) tungod sa kapakyas sa Office of the Vice President (OVP) pagsumiter sa ilang gipangayo nga mga dokumento.
* * *
Kon nailog pa sa grupo ni Villar ang liderato sa Senado ug sa finance committee, naglaom silang makalusot sa bicameral conference committee ang kapin sa P2 bilyones nga budget nga gipangayo ni Duterte.
Kay nabaraw man ang kudeta, mohiyos ang iyang budget ug mapugos si Duterte pagtaktak sa 100 ka kawani dungan sa pagtak-op sa satellite offices sa OVP sa Sugbo ug ubang mga probinsiya sa nasud. Mahimong mag-atubang pa gyod sa mas determinadong kampanya pagwara-wara sa pork barrel aron pagseguro nga makonbikto si Duterte sa impeachment trial. O pagpugos niya pag-resign na lang aron makapadagan pa sa pagka presidente sa 2028.
* * *
- Latest
