Kudeta sa impeachment
Samtang nagkinto pang mga kongresista sa ilang salida–sa pagtahud sa sugo ni Presidente Ferdinand Marcos Jr. sa dili pag-impeach ni Bise Presidente Sara Duterte pero sa samang higayon sa pagsang-at og impeachment complaint ngadto sa Senado sa labing daling panahon–walay pupanagana ang mga alyado ni Duterte sa Senado pagsegurong dili siya makonbikto.
Human sa pasumbingay nga mayoriya nila mo-absuwelto ni Duterte kon dunay mapahigayon nga impeachment trial, nisulbong ang mga taho nga mas unang mapalagpot ni Senate President Chiz Escudero nga gidudahang kabahin sa maniobra sa Malakanyang pagtaktak ni Duterte.
* * *
Bisan sa mga deklarasyon ni Marcos Jr. pagtahud sa ka-independente sa House of Representatives ug Senado, hingpit ang iyang pagkontrolar sa mayoriya sa mga senador ug mga kongresista. Maong walay problema ang paspas-pa-sa-kilat nga pagpalusot sa Maharlika Investment Fund ug sa tinuig nga nasudnong mga budget.
Bisan sa atras-abante ni Marcos sa impeachment ni Duterte, walay nagduda sa kalig-on sa liderato sa iyang ig-agaw nga si Speaker Martin Romualdez sa House. Pero unsa kaandam sa pag-alsa sa iyang mga alyado sa Senado pinangulohan sa iyang maguwang nga si Imee?
* * *
Kon si Cynthia Villar ang ipuli ni Escudero sa bag-ong mayoriya (nga gikatahong naglakip nilang Bato de la Rosa, Bong Go, Robin Padilla, Alan ug Pia Cayetano, Francis Tolentino, Bong Revilla, Loren Legarda, Migz Zubiri, Mark Villar ug Marcos), ug kon maneguro silang mobotar batok sa impeachment, magsaulog na si Duterte.
Labaw sa hulga sa protesta sa Iglesia ni Cristo (INC), ang lahugay sa Senado mobaraw sa paglaom sa labing laktod nga silot sa iyang mga atraso.
* * *
Pero bisan sa kakuwang sa panahon ug mga boto kinahanglan gihapong tumanon sa House ang sugo sa konstitusyon sa pagtuki sa ilang nadawat nga impeachment complaints. Kon may mapasakang articles of impeachment, obligado gihapon ang Senado sa paghimo og impeachment trial.
Makausab pa ba sa baruganan sa mga senador ang hiningusgang kampanya sa mas daghang katawhan nga angayng palagputon si Duterte sa puwesto? O mas palig-unon ug manghipos og dugang mga ebidensiya sa impeachment complaints uban ang paglaom nga mapili silang Kiko Pangilinan, Bam Aquino ug ubang mas tarung nga mga senador sa eleksiyon karong Mayo 12, 2025?
* * *
- Latest
