Police asset gipatay

CEBU, Philippines — Patay ang usa ka gikatahong police asset human kini gipusil makadaghang higayon diha sa Sitio San Juan, Alaska, Brgy. Mambaling sa Siyudad sa Sugbo pasado alas 9:35 Biyernes sa gabii. Ang biktima giila nga si Dexter Pinili Cuizon, 43, residente sa maong dapit.

Samtang ang suspetsado mao si Mark Jedrick Alvarez alyas” MJ” nga usa ka ex-convict nga nagpuyo sa Brgy. Duljo- Fatima ning siyudad.

Pag-abot sa kapolisan sa maong lugar, ilang nakita ang biktima nga nag buy-od na sa dalan ug adunay mga samad pinusilan sa ulo ug sa nagkadaiyang parte sa lawas nga maoy hinungdan sa iyang hinanaling kamatayon.

Si Police Major Efren Diaz Jr., hepe sa Mambaling Police Station mibutyag nga ang suspetsado mao say suspek sa mga nahitabong pagpamusil sa maong dapit.

Usa niini kadtong insidente sa pagpusil sa kanhi PBA player nga si Eliud Poligrates kinsa nasamdan adtong tungora, menor de edad pa si Alvarez adtong panahona.

Padayon ang hot pursuit operation  aron masikop ang suspek. — IBM BANAT NEWS