Ampo pa'y tigree!

Misaad si Senador Ronald “Bato” Dela Rosa nga dili siya magpadakop sa International Criminal Court (ICC) ug nga motahan lang siya sa iyang kaugalingon kon ugaling arestohon siya base sa order sa lokal nga mga hukmanan.  Mahinumduman nga buot unta sa senador nga modangop siya sa proteksiyon sa Senado apan ni’ng ulahi, iya usab gilaraw nga posible’ng magtago-tago na lang siya.  Dili gyud tingale lalim paminawon sa usa ka kanhi mananakop nga mao na usab ang mamahimong dakponon.  Makapahinumdum kining pamahayag ni Senador Dela Rosa sa pagya sa taga-Salot nga nagkanayon, “Ampo pa’y tigreee.”  Madahaan! 

“Piya-it must die”

Gikompirma ni Senate President Francis “Chiz” Escudero nga misulat ang Malacanang ngadto sa iyang buhatan aron sa pagpahinumdum sa Senado nga ang mga mga sakop sa gabinete mahimong mo-invoke sa ilang executive privilege atol sa public inquiry mahitungod sa pagdakop ni kanhi Presidente Duterte.  Apan alang kang Escudero, ang maong pribilehiyo dili usa ka blanket privilege.  Kon walay angayan itago ug kon transparent pa ang pamunoan, dili na unta kinahanglan gamiton ang executive privilege busa makaduda kining gibuhat sa Malacanang.  Mora man hinoon og gisagop nila ang balaod sa mga sindikato nga nagkanayon, “Piya-it must die.”  Fezteleern!

Barato ang fake news

“Naapektohan na’g diyotay” si Presidente Marcos sa pagdagsang sa mga fake news sa mga social media platforms busa mimando ang presidente sa usa ka hugtanon’g kampanya aron batokan ang sayop nga impormasyon dili lang mahitungod kaniya kon dili alang usab sa nasud.  Kon huna-hunaon, ma’s may kagahum ang Malacanang pagtuis o ba kaha pagtabon sa mga panghitabo.  Kay kon wala pa ang social media, daghan ang panghitabo nga dili masayran sa katawhan.  Tinuod ang panahom nga “Ang fake news sayon ug barato ra’ng buhaton; samtang ang tinuoray nga pagbalita, mahal ang kantidad.”  Maylain pa!

Hulga ang oportunista

Gipanghimakak ni Bise Presidente ang pasangil nga nanawagan siya alang sa pagdemiter ni Presidente Marcos, Jr., sa iyang katungdanan, hinunoa, ang mga dumadapig sa ilang banay mao lamang ang mihimo sa maong demanda.  Daghan man ang mga pundok nga nanawagan sa resignation sa presidente apan dili ikahibulong nga ang mga pagtagad kabahin nini mapunting gayod ngadto sa bise presidente tungod kay siya man ang maka-benepisyo kon ugaling molampus ang maong panawagan.  Kay ginaingon man gud nga “Kadtong mga oportunista nga adunay mas katuohan nga hulga mao ang labing gikahadlokan nga binuhat.”  Muleeng!

Tigulang nga ‘child actor’

Nasayran nga si world boxing champion Manny Pacquiao maoy modala sa papel ni Datu Lapulapu atol unya sa re-enactment sa makasaysayon’g Battle of Mactan. Apan adunay diyotay’ng suliran ni’ng pagsalmot ni Pacquiao tungod sa lagda sa Comelec kabahin sa mga kandidato. Mihangyo na hinoon Lapu-lapu Tourism Office og exemption sa Comelec kabahin niini ug nagpaabot na lang sila sa tubag sa ahensya.  Makapahinumduma kini’ng kahimtanga sa akong amigo nga ni-apply unta isip “child actor” sa usa ka TV station apan wala siya dawata tungod sa rason nga, “Tigulang na kuno siya.” Pagkatoytoy!