Insecure dahil sa tigyawat

Dear Dr. Love,

Ako po si Bryan, 22 years old, at matagal ko nang hinahangaan ang isang babae sa aming barangay. Napakabait at simple niya, at ramdam ko po na may pagkakaintindihan kami tuwing nagkakausap. Gusto ko sana siyang ligawan, pero may isang bagay na pumipigil sa akin, ang aking mga tigyawat.

Simula nang magbinata ako, tila hindi na ako iniwan ng mga tigyawat sa aking mukha. Sinubukan ko na po ang iba’t ibang sabon, gamot, at kahit mga home remedies na ipinapayo ng mga kaibigan ko. May mga pagkakataon na humuhupa ang mga ito, pero bumabalik din kaagad. Dahil dito, nawawalan po ako ng kumpiyansa sa sarili.

Tuwing magkikita kami ng nililigawan ko, pakiramdam ko ang napapansin niya lang ay ang mga tigyawat ko. 

Hindi ko tuloy magawang maging kompor-table at natural sa harap niya. Takot din po ako na baka pagtawanan o pandirihan niya ako kapag nalaman niyang may insecurities ako sa itsura ko.

Bryan

Dear Bryan,

Maraming salamat sa pagtitiwala at pagbabahagi ng iyong nararamdaman. Naiintindihan ko ang iyong pinagdaraanan at ang epekto ng mga insecurities sa ating kumpiyansa. 

Una sa lahat, nais kong ipaalala na ang tunay na kagandahan ay hindi lamang nasusukat sa panlabas na anyo. Ang iyong kabaitan, respeto, at kabuuang pagkatao ang higit na nagbibigay ng halaga sa iyo.

Ang pagkakaroon ng mga tigyawat ay normal lalo na sa mga kabataan. Kung nais mo pang masolusyunan ito, maaaring makatulong ang pagkonsulta sa isang dermatologist. Sila ang makakapagbi-gay ng tamang payo at gamutan na angkop sa iyong balat.Subalit higit sa lahat, ang pinakamahalaga ay matutunan mong tanggapin at mahalin ang iyong sarili. 

Magtiwala ka sa iyong kakayahan na magustuhan at respetuhin ng iba dahil sa kung sino ka, hindi lamang sa iyong panlabas na anyo. 

Kapag naramdaman ng ibang tao ang iyong kumpiyansa at pagiging totoo, mas madali rin nilang makikita ang kagandahan ng iyong pagkatao.

Huwag matakot na magpakita ng iyong tunay na sarili. Minsan, ang pagiging bukas at tapat sa ating mga insecurities ang nagiging daan para mas mapalapit ang loob ng iba sa atin.

DR. LOVE