Walay EJK sa WOD

Usa ka mangild-ad kinaiya nga anaa sa Commission on Human Rights (CHR) mao ang ilang pagka-one sided-biased nga mangangalagad. Tiaw bay, panahon sa War on Drugs (W0D) ni kanhi Presidente Rodrigo Roa Duterte (PRRD), ang mga namatay'ng drug users-addicts, drug pushers, drug lords ug uban pang nahilambigit sa illegal drug syndicate mao ray ilang gilabanan.

Samtang ang mga polis, kinsa sa maong gubat, namatyan sab og mga kauban nga gipatay sa naasoy'ng mga gukdonon, inay sab-ongan og medalya, giaway-gisaway-gitamay kay ang gibuhat, extra judicial killing (EJK) kuno?

May pinili ba diay ang CHR? Nganong ang mga drugista ra man ilang gidapigan?

Ang mga inosenteng tarong diayng gipangbiktima sa mga drugista?

Mao baya kini rason nganong namugna ang WOD ni PRRD sanglit iyang nakita nga niini rang paagihang masumpo nagakadaghang krimen sa atong nasod tungod sa yawan-ong illegal drugs.

Diin, sa iyang panahon, wala man tuod hingpit mapuo, pero midiyotay-mihinay ug dili ka na mahadlok molakaw sa karsada nga mag-inusara bisan sa halawom nang kagabhion.

Pahinumdom lang, Kon mohisgot gani tag war, dugoon gyod na.

Kay matag habig sa magka-away, may kaugalingong mga armas.

Pirmeng mipasidaan si PRRD nga payhagon gyod niya ang mikuyanap nang illegal drugs. Ug gianunsiyo, dugoon kini!

Busa, gitambagan niya tanang nahilambigit nga mohunong-mopalayo na niining dangerous war zone nga maoy target sa iyang kapolisan.

Iya pang gitanyagan kutob sa mosurender nga i-rehabilitate silang libre sa atong gobiyerno. Apan dili tanan nagmatngon sa iyang pahimangno.

Aduna gyoy gahi, kinsa misulod gihapon sa maong dangerous war zone. Hinungdan, nga may pipila kanila ang naalot kay napiksan sa mga saag bala o kay naalaan nga kaaway.

Ug matawag na ba diay kining extra judicial killing? No! Kondili, collateral damage lamang.

Ikaduha, ang nahilambigit sa illegal drugs may mga armas sab baya kini ug dili mahadlok mopatay. Lugoson-patyon man gani ang kaugalingong igsoon-inahan, mga polis pa kaha? Ikatulo, sa natad sa gubat, ang mipatay sa napatayng kaaway maisip ba nga usa ka matang sa EJK?

Ug mao kini ang nahitabo sa WOD ni PRRD. Hinungdan, nga kon may inosente mang nangamatay. Kini dili biktima sa EJK. Kondili, kabahin sa collateral damage during war.