Mga publikong tunghaan giandam na alang sa eleksyon
CEBU, Philippines — Andam ang kagamhanan sa siyudad sa Mandaue nga motabang sa Commission on Election (Comelec) sa pag-andam sa mga lawak sa mga publikong tunghaan nga maoy mamahimong poling precinct sa Mayo 12, 2025 nga National ug Local Election.
Kini ang gipadayag ni Atty Miguel Lumapas nga maoy executive secretary ni Mayor Glenn Bercede nga nahinabi sa mga tigbalita.
Si Atty. Lumapas miingon nga adunay school board sa siyudad sa Mandaue nga maoy mohatag og pagtagad kon ang Comelec mangayo og tabang alang sa pag-andam niini.
Sa nasayran ang Comelec sa maong dakbayan nakapahigayon na og inspection sa mga lawak sa mga publikong tunghaan sa maong dakbayan.
Si Jockelyline Reuyan, assistant election officer sa dakbayan miingon nga sa gihimo nilang pakisusi sa mga lawak saringan wala silay nakita nga mga dagkong ayohon sa mga polling precinct.
Matud pa niya adunay ginagmay lamang nga ayuhon sama sa electrical connection ug kini ang gihatagan na nila og pagtagad.
Si Reuyan mitug-an nga ang siyudad sa Mandaue adunay 271 ka mga gi-cluster nga polling precinct sa Mayo 12, nga local ug national nga eleksyon. (BANAT NEWS)
- Latest
