Comelec nipaubos sa yellow ug orange categories sa pipila ka lugar

CEBU, Philippines — Gihulagway sa director sa Commission on Election Central Visayas Francisco Pobe nga malinawon ang rehiyon hangtud karong adlawa.

Matud ni Pobe nga anaa sa 97 porsyento sa mga lugar sa rehiyon-7 ang ubos sa green category o malinawon base sa nasayran sa Comelec gikan sa ilang partner agencies.

Si Pobe nagkanayon nga bisan nga ang kasagaran ubos sa green category dili lang gihapon angayan nga mokompiyansa.

Gibutyag ni Pobe nga adunay mga dapit nga gipaubos sa yellow category diin ang maong mga lugar adunay isyu sa political rivalry o init ang politika.

Ang gipaubos sa yellow category mao ang mga lugar sa Probinsiya sa Bohol nga gilangkuban sa mga lungsod sa  Baclayon, Buenavista, Candijay, Pilar, ug Ubay samtang sa Sugbo mao ang Dakbayan sa Lapu-lapu.

Adunay gipaubos sa orange category nga gilangkuban sa mga lungsod sa Bilar ug San Miguel sa Bohol diin nagpasabot kini nga adunay isyu sa peace and order o adunay krimen nga nahitabo base sa assessment sa PNP ug AFP.

Si Pobe nagkanayon nga ang maong mga category gibase kini sa mga nanglabay nga election ug dili alarming ang ubang  level category ug malaomon siya nga moubos kini ngadto sa green category o generally peaceful.

Dugang ni Pobe nga kanunay’ng andam ang Comelec sa tanang panahon ilabi na niining nagsingabot nga national ug local elections. BDB BANAT NEWS