Cebu nagtinguha nga mokulit og laing daog
CEBU, Philippines — Lab-as pa sa malampuson nilang pagbalik gikan sa lima ka tuig nga pahuway sa Maharlika Pilipinas Basketball League, ang Cebu Classic naglaraw nga moposte sa ikaduha nilang sunod-sunod nga daog sa dihang ilang sangkaon ang Quezon Huskers sa 7th MPBL season karong adlawa (Lunes, Marso 17) didto sa Bataan People's Center sa Balanga, Bataan.
Magsugod ang ilang engkwentro sa korte sa alas-6 sa gabii.
Gipaabot nga usa kini ka kulbahinam nga panag-abot sa duha ka koponan nga midaog sa una nilang duwa bisan tuod sa managlahi nga panaagi.
Ang Cebu madasigong mibangon human malubong og 19 puntos sa katapusang kuwarter aron pakuratan ang Caloocan Batang Kankaloo, 77-76, samtang ang Quezon midominar sa Batangas City Tanduay Rum Masters, 70-46.
Sa gihapon, ang Cebu Classic magsandig nilang Rashawn McCarthy, Limuel Tampus, Lean Martel, Ladis Lepalam, Darrell Manliguez, Mark Meneses ug Brylle Ivan Meca sa ilang tinguha nga makasagunson og daog.
Sa pikas nga habig, ang Huskers maglaum nilang Diego Manuel Dario, Ximone Sandagon, Judel Ric Fuentes, Vince Magbuhos, Louell Jay Gonzales, Jason Opiso ug John Paul Saro aron pagsustinir sa mainit nilang sinugdanan.
- Latest
