EDITORYAL — Magic 12 wa pay kasigurohan

Hapit na ang eleksyon sa Mayo, apan daghan pa gihapon sa mga Pilipinong botante ang wala pay napiliang 12 ka senador nga botaran sa maong adlaw.

Sa report  sa Philstar.com mayoriya pa sa mga Pilipinong botante ang wala pay kompletong kandidato sa 12 ka senador nga kinahanglang botaran.

Magduha nalang ka bulan ug eleksyon na sa Mayo 12, apan sa gihimong survey sa Pulse Asia murag lugitonon pa kaayo ang katawhan bahin sa kung kinsa ilang napiliang botaran sa pagka-senador.

Kining survey gihimo niadto pang Pebrero 20 hangtud Pebrero 26, nga nagpakita nga sa 2,400 ka mga gipangutana nga mga botante, 38 porsiyento lang ang duna nay naa sa ilang hunahuna nga botaran sa pagka-senador.

Ang uban nila, 11 pa lang ka kandidato, dunay uban nga napulo ra gyud ilang napilian samtang duna say uban nga usa palang gyud ang naa sa ilang hunahuna. Samtang duna sab sa mga napangutana nga wala gyud pa silay nahunahunaan kun kinsay suportahan.

Kani nga resulta sa survey duna gyud ni kausaban kun buhaton kini karong adlawa tungod kay duna gyuy epekto kining kasikas karon sa nasud mahitungod aning pagdakop ug pagdala kang kanhi presidente Rodrigo Duterte didto sa International Criminal Court sa The Hague sa The Netherlands sa miaging semana.

Apan ang maong survey gihimo tungatunga sa init na kaayong pagsige og hisgot kabahin sa posibleng impeachment ni Vice President Sara Duterte.

Hinuon duna nay mga pangalan nga nakasulod sa gitawag og “Magic 12” apan dili pa sab nila sila siguradong mao gyuy botaran sa aktwal nga eleksyon, posible sab nga kadtong wala maapil sa 12 nga nag-una, maoy makaabante sa mosunod nga mga adlaw.

Depende kini sa dagan sa mga panghitabo karong mosunod nga mga adlaw.

Sa mga botante diha nga wala pay napilian, kinahanglan mopili og tarong nga kandidato nga dunay matampo sa pagpalambo sa nasud ug dili kadtong magpa-grandstanding lang tungod sa ilang kasikat ug dili kadtong magtisok og kagubot sa nasud.