Duha ka HVI sikop atol sa buy-bust operation sa kapolisan

CEBU, Philippines — Nadakpan ang usa ka 24-anyos nga lalaki nga suspetsadong high value individual atol sa buy-bust operation sa Carbon Police Station sa Cebu City Police Office (CCPO) diha sa Sitio Bato, Barangay Ermita, Siyudad sa Sugbo kagahapon sa kadlawon.

Ang suspetsado mao si Marjun De Luna Bedolido alyas “Deloy”, walay trabaho ug nagpuyo sa Sitio Bato, Barangay Ermita niining siyudad.

Nasakmit sa kapolisan gikan sa suspetsado ang 70 gramong shabu nga nikantidad ngadto sa P476,000.

Ang mga operatiba sa Carbon Police Station nakadawat og impormasyon kalabot sa ilegal nga kalihokan sa suspetsado.

Giingong sa pakisusi sa kapolisan nakompirma nga ang suspetsado namaligya og ilegal nga drugas.

Kasong kalapasan sa Section 5 ug 11, Article II sa Akta Republika 9165 kun “Comprehensive Dangerous Drugs Act of 2002”.

Sa laing bahin, niabot sa 50 gramong shabu nga nagkantidad og P370,000 ang nasakmit atol sa buy-bust operation sa mga sakop sa City Intelligence Unit (CIU) ug City Drug Enforcement Unit (CDEU) sa kapolisan sa Lapu-Lapu City Police Office (LCPO).

Si Police Lieutenant Colonel Christian Torres, tigpamaba sa LCPO nagkanayon nga ang joint buy bust operation nga gipahigayon ang gipangulohan nila ni Police Lieutenant Colonel Jewel Matura Nicanor, hepe sa CIU ug Police Lieutenant Jomari Javier, pangulo sa CDEU ug ubos usab kini sa kamandoan ni Police Colonel Dyan Agustin, direktor sa LCPO.

Matud pa ni Torres nga gihimo ang maong buy-bust operation human sila nakadawat og taho kabahin sa giingong ilegal nga kalihokan sa suspetsado. Ang suspetsado gikonsidera sa kapolisan nga HVI nga pusher tungod kay sa ilang monitoring nga gihimo kini mohalin og 100 gramo ngadto sa usa ka kilo sa matag semana. Ug ang operasyon niini dili lang sa Siyudad sa Lapu-Lapu lakip na ngadto sa mga silingang siyudad sa Mandaue ug Lungsod sa Cordova. Romeo T. Limpangog, BDB BANAT NEWS