Garcia dili gustog transparensiya?

Bisan niadtong dili pa electronic voting counting machines ang gigamit sa Commission on Election (Comelec) nga pang-ihap sa mga boto, kondili, manomano lamang, nagkahugaw na ang imahe sa nahisgotang institusiyon.

Kini tungod kay labayon man gayod og mga pagduda ang Comelec sa pipila ka kandidatong nangapilde sa eleksiyon ug sa ilang libolibong dumadapig.

Vote-buying, ballots switching, ghosts’ voters, goons harassments ug uban pang gidili sa balaod manggawas, nga maoy basehan sa ilang mga reklamo, pero wala gyoy kandidatong gipangkasuhan ug nangapriso. Nga sa ato pa, maayo ra ang Comelec mohimog patakaran apan kulang sa hugtanayng pag-implementar.

Mao nga dili g'yud mabasol nga may hut-ong sa katawhan nga magduda gayod sa mga pamaagi sa Comelec, labi na sa pagpagawas sa opisyal-kompletong resulta sa eleksiyon.

Kon ang kaniadtong manomanong iniphanay sa mga boto nga adunay watcher (tigbantay) ang matag partido, matikas man gihapon ang resulta, unsa na kaha niining panahon nga electronic vote counting machines ang gamiton sa Comelec, diin ang iniphanay dili na makita sa bisan pila pa ka buok ang nagbantay kay otomatik nga ang unsay naka-program na sa sistema maoy moihap ug masunod?

Busa, pinaagi sa social media, milyonmilyong clean election lovers ang nakonbinse sa pagpasabot ni Atty. Jeryll Harold Respicio, CPA-lawyer ug kanhi IT expert-consultant, dihang iyang giladlad ang kabahin sa kinatibuk-ang proseso, diin delikadog masudlan og hackers ang sistema ug may posibilidad nga madaya-tikas ang iniphanay nga dili makita.

Ang pait, kay inay pasalamatan kining IT expert sa maayo niyang tumong nga makatabang paglimpiyo sa hagbay rang nagkahugaw nga imahe sa Comelec, gipasakan pa hinuog kaso nga cyber libel  ni Commissioner George Garcia.

Okay ra unta, kon ang administrasiyong Marcos napuno sa kaligdong-ka-honest-kadalaygon sa ilang pagpangalad. Apan unsay ilang nahatag sa katawhan? Kaharuhay-kaasenso ba?

Si Comelec Commissioner Garcia, usa ba ka malinis-kasaligang opisyal, kinsa wala gyod mahilambigit sa mga dagkong anomaliya-kontrobersiya diha sa buhatan nga iyang gipamunoan?

Ang tubag ning maong mga pangutana, igo nang makapahayag-tug-an nganong dili siya abiyerto sa sugyot ni Atty. Respicio nga ang maong sugyot alang man sa kabulahanan sa Comelec ug katawhan?

Nan, kinsa ba kanilang duha karon ang mamahimong maot? Ikaw nay hukom, Bay!