HVI nadakpan sa buy-bust operation sa siyudad sa Carcar
CEBU, Philippines — Nagtingkagol sa prisuhan ang usa ka high value individual human kini nadakpan sa mga operatiba sa PNP Drug Enforcement Group-Special Operations Unit(SOU)-7 sa ilang buy-bust sa sitio Talamban, Barangay Napo, dakbayan sa Carcar kagahapon sa kadlawon.
Ang dinakpan mao si Aaron Fritz Sobisol Claracay, 35 anyos, wala'y trabaho ug nagpuyo ra sab sa naasoy nga lugar. Nasakmit sa mga operatiba gikan sa dinakpan ang 52 gramos nga shabu nga nibalor og P356,600.
Ang mga ebidensya nga nakuha gisumetir na sa PNP Regional Forensic Unit-7 alang sa laboratory examination.
Nasayran nga gipaubos sa duha ka semana nga monitoring ang suspetsado human nakadawat og impormasyon ang kapolisan nga kini nalambigit sa illegal nga kalihukan.
Matud pa makabaligya ang suspetsado og 50 gramos nga drugas kada semana ug ang area of operation niini kay siyudad sa Carcar apan giingong magkuha kini og supply sa siyudad sa Sugbo.
Kasong kalapasan sa Republic Act 9165 ang ipasaka batok sa suspetsado. (BANAT NEWS)
- Latest
