Track oval sa CCSC abli na sa publiko
CEBU, Philippines — Gianunsyo ni Cebu City Mayor Raymond Alvin Garcia ang subli nga pag-abli sa track oval sa Cebu City Sports Complex sugod niadtong Enero 23, 2025.
Nakita ni Garcia nga kinahanglan na gyud kini nga ablihan human sa kapin usa ka buwan nga pagpaubos niini og repais ug gigamit sab sa nakalabay nga mga kalihokan sa Sinulog.
Ang pangu sa CCSC nga si Jovito Taburada sa pakighinabi sa Banat News nga nahuman na gyud og ayo ang mga major damages sa track oval.
Gipasirad-an kini niadtong Nobyembre 2024 ug gisugdan na kini og repair niadtong Disyembre na.
“Sa pag-re-open og balik, so far, so good. Wala na’y problema. Nagamit na gyud sa Sinulog unya mao man ni promise ni mayor mga ablihan na nato after sa Sinulog,” suma pa ni Taburada.
Wala sa’y damage ang track oval pagkahuman og pagpahigayon sa Sinulog Grand Ritual Showdown kun diin giagian sab kini og mga dagko nga mga props ug sets.
Dugang pa ni Taburada nga anaa sab ang Department of Engineering and Public Works nga kanunay nga mo-assess sa sitwasyon sa pag-repair sa track oval aron hingpit na kini nga mapahimuslan og tarong sa mga buot nga atleta ug sa mga tawong gustong mag jogging.
Gipasirad-an ang track oval human nga nasuta nga adunay dagko nga mga damage human nga gipahihayon ang Pasigarbo sa Sugbo. IBM BANAT NEWS
- Latest
