Madayon ang impeachment

Bisan sa ilang mayoriya sa Kongreso, lisod para sa administrasyon ni Presidente Ferdinand Marcos Jr. ang paglusad ug pagtiwas sa impeachment proceedings batok ni Bise Presidente Sara Duterte. Pero mas lisod ang pagpasabot unsay kapuslanan sa ilang mga imbestigasyon (nga nigasto og minilyon ka pesos sa buhis sa katawhan) batok sa mga Duterte.

Kakuwang sa panahon sa dili pang eleksiyon ug sa dili pa mapupos ang sesyon sa Kongreso ang dakong problema sa administrasyon. Pero mas dakong problema ang pagkumbinser sa katawhan nga pakatulgon lang ang nahipos nga mga ebidensiya.

***

Niang lista sa akong nakitang mga timaan nga madayon ang impeachment ni Duterte sa House of Representatives ug ang impeachment trial sa Senado:

•             Pasiunang mga kasayuran nga ang ikaupat nga impeachment complaint nga ipasaka karong adlawa, Enero 6, mahimong pirmahan na og kapin sa gatos ka mga kongresista; aron nga

•             Malaktawan nang public hearings sa House Justice Committee nga modugang sa kalangay ug igo rang mobalik pagpangutana sa resource persons ug pagsubli sa mga ebidensiya nga nahipos sa House Quad Committee ug House Committee on Good Government;

***

•             Diretso nang basahon sa plenaryo inig balik sa sesyon karong Lunes, Enero 3, uban ang pag-ila sa mga sakop sa panel of prosecutors ug pahibawo nga isumiter nang articles of impeachment sa Senado;

•             Pasumbingay nga andam nang Senado sa impeachment trial apil ang pagreklamo ni Senador Nancy Binay nga wala siya ganahi nga napilian sa mayoriya nga kolor sa ilang robe isip impeachment judges;

***

•             Pasiunang paghulagway nga dili maproblema ang administrason sa pagkumbinser sa 16 ka senador pagkonbikto ni Duterte kay walay nisukwahi sa pangangkon ni Senate President Chiz Escudero nga unanimous ang ilang pag-aprobar sa 2025 budget, gawas sa duha (silang Koko Pimentel ug Risa Hontiveros); ug

•             Pagpamugos sa Malacañang ug Kongreso sa ?26 bilyones nga Ayuda sa Kapos ang Kita Program (AKAP) ug ?288 bilyones nga pork barrel projects sa Department of Public Works and Highways (DPWH) bisan sa lapad nga protesta gikan sa nagpakabana nga mga sektor maoy dili malalis nga ebidensiya sa determinasyon sa administrasyon sa pagpapas sa bisan unsang nahibilin nga mga pagduda sa nanagana pa nga mga kongresista ug mga senador.