14 golds hinakot ng gymnastics team sa Chiu Wai Chung Cup sa Hong Kong

MANILA, Philippines — Magarbong tinapos ng national gymnastics team ang kampanya nito sa 2024 season matapos hu­makot ng kabuuang 14 gintong medalya sa Chiu Wai Chung Cup na gi­nanap sa Hong Kong.

Bumandera sa ratsada ng Pinoy squad si Karl El­drew Yulo matapos humakot ng walong gintong medalya sa kaniyang di­bis­yon.

Unti-unting gumagawa ng sariling pangalan si Yulo nang pagharian nito ang juniors individual all-around para magarbong si­mulan ang kampanya nito sa torneo.

Hindi nagpaawat si Yu­lo nang walisin nito ang anim na gintong medalya sa individual apparatus na floor exercise, vault, pa­rallel bars, horizontal bar, pommel horse at still rings.

Bukod pa rito ang gintong medalyang nakamit ni Yulo sa team event ng junior men’s artistic gymnastics.

Si Yulo ang nakababa­tang kapatid ni Carlos Edriel Yulo na sumungkit ng dalawang gintong me­dalya sa 2024 Paris Olympics.

Sa kabuuan, humakot ang national gymnastics team ng 14 ginto, anim na pilak at limang tanso sa naturang torneo.

Nagdagdag ng tatlong ginto si Mi­guel Besana sa men’s se­niors individual all-around, floor exercise at pommel horse, habang na­siguro naman ni Justine Ace De Leon ang gintong medalya sa men’s still rings at parallel bars.

Nakahirit pa ng ginto ang tropa sa seniors men’s team event.