EDITORYAL - Hinayhinay sa gipangkaon

Party diri, party didto tungod aning nagsingabot nga Pasko. Halos tanang kompanya, bisan magkabarkada, pamilya, mag-party gyud aning panahona nga magsilbi sab nilang tapuk-tapok ug pag-relax og gamay.

Kaning salo-salo sa Pasko nahimo ng tradisyon sa tanang Pilipino, mao nga bisan ang mga gagmay nga mga kompanya, bisan ang mga eskuylahan mopahigayon gyud og Christmas party ug mag exchange gifts pa gyud.

Apan ang Department of Health nipagawas og pahimangno sa tanan bahin aning naghinobrang pagkaon karong panahona. Gawas sa kaon, duna pa gyuy mga ilimnong makahubog nga makadugang sa risgo sa panglawas.

Partikular sa mga gipasidan-an kadtong adunay mga daan ng gihambing balatian sama sa hypertension ug diabetes nga mosukmat kun masobrahan ang pagkaon sa mga ginadili kanila.

Ang Pasko kun maayo lang kanunay ang lawas, naa ra kada tuig. Busa, aron masigurong makaapil gihapon sa sunod nga Christmas parties sa sunod tuig, dili lang una gyud magpasulabi og kaon ilabi na kadtong mga gidili na kanila kun masobrahan.

Dili sab kalimtan ang pagtumar sa mga medikasyon o maintenance medicines aron dili mauwahi ang tanan kay sagad aning mga sakit nga traydor sama sa hypertension anha gyud mogara kun masipyat ang tawo sa iyang gipangkaon.

Sa pikas bahin, diha sa mga eskuylahan dili lang unta pugsanay ang pagpaamot sa mga bata sa ilang Christmas pary kay dili man tanan adunay ikatampo ilabi na ang mga gikan sa kabus sa pamilya.

Ang ilahang presensiya bisan walay ikaamot, isipon nalang unta nga kini gasa ug angay ikalipay nga bisan kausa sa usa ka tuig nakakaon og lamiang pagkaon kining mga batang kabus.

Panahon karon sa Pasko ug panahon kini para makabawi ang mga nahatagan og grasya karong tuiga nga maulian ang kaayo sa kapalaran kanila pinaagi sa pagpaambit sa ilang mga grasya ngadto sa uban aron kini magpadayon sa mosunod nga katuigan.