4 tirador ng convenience store huli sa Pampanga
MANILA, Philippines — Nasakote ng mga tauhan ng Police Regional Office (PRO)-3 ang apat na tirador ng convenience store na pinaniniwalaang miyembro ng organized crime group sa Central Luzon nitong Linggo.
Kinilala ni PRO-3 director PBrig. Gen. Redrico Maranan ang mga suspek na sina Tristan Awa Bestoguey, Tom Contade Nadnaden, Harold Bangloy Saqueb, at Daniel Dave Tolingan Egsaen, pawang mga residente ng Baguio City at Mountain Province.
Ang mga suspek ay nadakip sa isinagawang follow-up operations ng mga pulis matapos makatanggap ng tawag ang mga awtoridad hinggil sa pagnanakaw sa convenience store sa Barangay Consuelo, Floridablanca, Pampanga nitong Oktubre 20 bandang ala-1:30 ng madaling araw.
Agad na nadakip si Bestoguey at sa follow-up operations ng mga pulis ay naaresto rin sina Nadnaden, Saqueb at Egsaen. Sila ay nakuhanan ng iba’t ibang uri ng baril, granada, P90,000 cash, groceries, at isang SUV na Toyota Fortuner (CCL-8293).
Ang mga suspek ang itinuturong sangkot sa panghoholdap sa ilang convenience stores sa Aliaga at San Jose City, Nueva Ecija.
- Latest