CABC 2nd Boysen Cup mo-arangkada na

CEBU, Philippines — Unom ka teams ang magbugno alang sa korona sa Cebu Architects Basketball Cub (CABC) 2nd Boysen Cup nga mosikad na karong adlawa (Dominggo, Oktubre 20) diha sa Benedicto College-Cebu City Campus gym. Matag koponan langkoban og lima ka sinaligan nilang mga players samtang ang ilang makauban nagagikan sa drafting.

“The drafting system proved successful in our previous tournaments as even the lowest-seeded teams managed to rise to the top. In fact,  in one of our previous seasons, a team with a 0-5 record came back to win the championship,” matud pa ni CABC chairman Paolo Alberto atol sa usa ka press conference niadtong Biyernes didto sa Club Filipino de Cebu asa Ayala-FGU Center.

Mag-ilog sa titulo sa ikatulo ug panapos nga komperensiya sa CABC ning tuiga nga gipaluyohan sa Boysen Paints mao ang Knoxout, Titan, Plexibond, Roofgard, Healthy Home, ug Konstrukt.

Moduwa sila og single round robin sa eliminasyon diin ang top 2 makaangkon og awtomatik nga luna sa semifinals.

Ang No.3 ug No.4 adunay twice-to-beat advantage batok sa No.5 ug no.6 sa quarterfinal playoffs.

Ang mga mananaog mo-abante sa semis ug dayon sa kampiyonato nga usa ka tingakay nga duwa.