Comelec gipaabot dugokon og tawo karon

CEBU, Philippines — Karong adlawa, Oktubre 8, 2024 maoy kataposang adlaw sa pagduso og certificates of candidacy sa mga buot mokandidato sa 2025 midterm elections mao nga gilauman nga mag-abot sa buhatan sa Commission on Elections (COMELEC) sa Central Visayas.

Ssi Police Lieutenant Colonel Gerard Ace Pelare,  tigpamaba ni Police Regional Office(PRO)-7 Regional Director Brigadier General Anthony Aberin, gipaabot nga modagsa gyud ang mga kandidatong moduso og COC  kauban ang ilang mga supporters.

Gihimug-atan hinoon ni Pelare nga sukad sa pagsugod sa filing sa COC niadtong Oktubre 1  nakahan-ay na ang security coverage ug hangtod ron naka heightened alert gihapon ang kapulisan sa rehiyon. Masaligon sab ang PRO-7 nga ang mga supporters sa mga magpapili sa eleksiyon sunod tuig dili mangita og gubot ug ang kapulisan nagtuo nga gipahinumdom na sab  sila sa mga gisuportahan nila nga aspirant sa angayan ug dili angayang buhaton.

Sa pikas bahin, si Pelare miingon nga kadtong mga polis nga nadestino sa Central Visayas kun dunay kabanay o miyembro sa pamilya nga magpapili sa eleksyon temporaryo una silang ibalhin og laing lugar aron dili makaimpluwensiya sa eleksyon.

Kun makita na ang opisyal nga mga kandidato, ayha pa sugdan ang reshuffling sa kapolisan ug mohimo sab ang PRO-7 og threat assessment pagtino kun unsa nga lugar ang init ang panagribal sa mga kandidato.

Sutaon sab kun kinsa ang kinahanglan mo-apply sa Police Security and Protection Unit (PSPU) aron mahatagan og security coverage. (BANAT NEWS)