Plano sa duha ka resettlement area sa siyudad iduso sa CCPDO
CEBU, Philippines — Gipaabot nga iduso sa Cebu City Planning Development Office ngadto sa Task Force Pabahay ang Development Plan sa Proposed Budlaan Valley Resettlement Area ingon man sa Camp Marina Resettlement Area sa Barangay Kalunasan.
Gihuwat na lang sab sa Task Force Pabahay ang legal opinion gikan sa City Legal Office kabahin sa plano nga “land swapping” sa Department of Environment and Natural Resources-7 ug ang pagbawi sa gi-donar nga yuta ngadto sa Evangelical Free Church human wala kini makatuman sa mga nalatid sa kasabutan sa donasyon.
Gani, ang luna nga anaa sa EFC wala pa kini gamita hangtud karon.
Tumong sa sugyot nga pagbawi sa gi-donar nga mga luna mao ang paggamit niini alang sa housing program sa kagamhanan.
Matud ni Atty. Ronald Anthony Librando, executive director sa Division for the Welfare of the Urban Poor nga nagsugod na sila sa pakignegosasyon sa mga maapektohan sa Budlaan Valley Resettlement Area ug naghuwat na lang sa development plan gikan sa CPDO.
Ang maong luna moabot ngadto sa 5.4 ka ektarya ug ang 1.1 ektarya niini gi-donar sa kagamhanan ngadto sa DENR og 4.3 ka ektarya ang sa Evangelical Free Church. Ang maong mga luna na-donar kini sa panahon sa kanhi mayor sa dakbayan nga si Eulogio E. Borres.
“Ang problema sa Evangelical (Free Church) kay wa gyud ma-contact pero naa na man tay action sa City Legal (Office). So, wait lang ta unsay recommendation sa City Legal kon okay ba, wala na bay legal impediments ang proposed nato nga reversion from our donated property sa Evangelical Free Church,” suma pa ni Atty. Librando. (BANAT NEWS)
- Latest
