HVI nasikop sa kapolisan sa Mabolo

CEBU, Philippines — Natingkagol sa prisohan ang usa 44-anyos nga lalaki nga giingong ka high value individual human kini nasikop sa kapolisan sa Mabolo Police Station sa Cebu City Police Office niadtong Miyerkules sa gabii diha sa Barangay Carreta, Dakbayan sa Sugbo

Ang suspetsado mao si Rogelio Magbanua, residente sa naasoy nga lugar ang naaktohan sa kapolisan nga namaligya og ginadiling drugas.

Nasakmit sa kapolisan gikan kang Magbanua ang 75 gramong shabu nga nikantidad tanan ngadto sa kapin sa P500 mil.

Nagkanayon si Police Major Romeo Caacoy, Jr., hepe sa Mabolo Police Station nga samtang nagpatrolya ang iyahang mga sakop naaktohan ang suspetsado nga namaligya ug nidunol sa ilegal nga drugas.

Matud ni Caacoy nga ang suspetsado nadakpan na kaniadto gumikan gihapon sa kalambigita sa ilegal nga drugas ug gawas niini aduna sab kini kaso sa pagpangawat.

Kasong kalapasan sa Section 11, Article II sa Akta Republika 9165 kun “Comprehensive Dangerous Drugs Act og 2002” ang kasong ipasaka batok sa suspetsado.

Sa laing bahin, tulo ka indibidwal ang nadakpan samtang usa ka drug den ang napuhag atoll sa buy-bust operation sa Philippine Drugs Enforcement Agency(PDEA) Negros Oriental Provincial Office ug Police Regional Office-7 Intelligence Unit-Negros Oriental Provincial Intelligence Team ngadto sa Zone 2, Barangay Lo-oc, Dumaguete City, Probinsiya sa Negros Oriental.

Nasikop ang subject sa operasyon ug tigmentinar sa drug den nga si Joeson Aguilar, 29 anyos, self-employed ug duha ka tigbisitahan sa drug den nga sila si John Michael Maribao, 26, promodiser ug Junard Maribao, 2, self-employed.

Nasakmit gikan sa mga suspetsado ang unom ka putos nga shabu nga nitimbang ngadto sa unom ka gramo ug nikantidad ngadto sa P40,800, buy-bust money ug nagkalain-laing drug paraphernalia.

Base sa taho sa kapolisan nga si Aguilar nadakpan na usab kaniadto sa kasong kalapasan sa Section 5, sa Akta Republika 9165 ug nakagawas pinaagi sa plea bargaining agreement.

Samtang niabot ngadto sa sobra P1milyon ang kantidad sa ginadili nga drugas ang nasakmit sa kapolisan sa Central Visayas human sa gipahigayon nilang usa ka adlaw nga Simultaneous Anti-Criminality Law Enforcement Operation (SACLEO).

Siyam ka tawo ang nasikop sa maong operasyon diin 153.04 ka gramong shabu ang nasakmit nga nibalor tanan ngadto sa 1,040,672. (BANAT NEWS)