Pagkatuytoy!

Dili angay’ng sawayon ang kapolisan nga miadto sa compound sa Kingdom of Jesus Christ sa Davao City nga modakop ni Pastor Apollo Quiboloy.

Gihimo lang sa kapolisan ang ilang katungdanan kay gimandoan man sila sa hukmanan nga pangitaon ug dakpon si Quiboloy nga gipasakaan og kasong child ug sexual abuse.

Duna sab siya’y warrant sa kasong qualified trafficking in persons nga giisyu sa hukmanan sa Pasig City, ug warrants gikan sa hukmanan sa United States sa kasong sex trafficking, ug bulk cash smuggling.

Unsa man diay ipasabot sa mga sakop sa KOJC, dili lang dakpon si Pastor Quiboloy abi kay naa kini sulod sa compound bisan og dunay warrant of arrest?

Kon kwestyonon nila nganong mga 2,000 ka polis ang gigamit pag-adto sa compound sa KOJC aron dakpon si Quiboloy, ang rason niini kay nanagana ang kapolisan kay molaban man gyud ang mga sakop sa KOJC kon madakpan na si Quiboloy.

Karon, mi-file og Petition for a Writ of Amparo ang mga sakop sa KOJC ug nangayo’g tabang sa hukmanan nga pugngan ang kapolisan nga mohimo’g operation sa ilang compound.

Tuod, gimandoan sa usa ka hukmanan sa Davao ang kapolisan nga dili usa mohimo og barikada, checkpoints samtang husayon pa ang petisyon nga gisang-at sa KOJC.

Sa pag-file nila sa Petition for a Writ of Amparo nangangkon ang KOJC nga gilapas sa kapolisan ang ilang katungod ug nakahimo kini og kalapasan sa balaod.

Karon, mobalik ta sa pangutana kon mahimo ba lang diay nga si Apollo Quiboloy anha lang moestar sa compound sa KOJC ug dili ra siya dakpon bisan og duna siya’y warrant of arrest?

Kon mao man gani na, mahimo kini nga sumbanan nga ang mga wanted ug pinangita sa balaod, pwede ra diay nga anha motago sa mga simbahan kay dili man diay kaha sila mahimong dakpon basta naa sa susama nga lugar?

Matud pa sa akong amigo, “pagkatuytoy.”

* * *

Husto ra baya si Cebu City acting Mayor Raymond Alvin Garcia nga pasugdan na niya ang pagplano kabahin sa pagahimoong Sinulog Grand Parade karong Enero bisan og wa pa si Mayor Michael Rama.

Unya pa sa Nobiyembre mapupos ang unom ka buwan nga preventive suspension ni Mayor Rama nga gimando sa Ombudsman, ug kon maghuwat pa si Raymond sa iyang pagbalik, mora’g apiki na sa pagpangandam ang duha na lang ka buwan.

Ang isyu lang niini mao ang nagkasumpaki nila nga baruganan ni Mayor Rama ug ni Raymond. Si Rama gusto nga adto gihapon sa SRP ipahigayon ang Sinulog Grand Parade, samtang si Raymond, gusto nga ibalik na sa Cebu City Sports Center.

Maayo tingali nga kuhaon sab nila ang baruganan sa City Council.