Mga Kaabag nga Layko sa Pangalagad Alang sa Espiritu hanong Kalingkawasan

Unang bahin

(Lay Collaborators in the Ministry of Spiritual Liberation)

Mas makatabang ug mas praktikal nga pagaumolon usab ang mga kahugpongan sa mga kaabag nga layko alang sa Pangalagad sa Espirituhanong Kalingkawasan. Sila ang mamahimong mga kaabag sa mga eksorsista ug sa kaparian diha sa pagbulig sa mga kaigsuonang matuohon nga nahimong biktima sa makahasing impluwensiya sa yawa. Sa laing bahin, kahigayonan usab kini alang sa mga layko sa pagbansay sa ilang katungod ug katungdanan isip mga binunyagan. Katungod isip binunyagan nga makadawat sa pag-atiman nga pastoral ug sacramental sa simbahan. Sa laing bahin katungdanan sa mga  binunyagan nga panalipdan ang ilang pagka binunyagan batok sa tanang makadaut niini  ug nga manginlabot sa mga kalihukan alang sa kalingkawasan segun sa ilang katakus ug kahimtang. Kining maong pundok ang maglangkob ning mosunod:

1.    Spiritual Director. Usa ka pari nga eksorsista nga gitahasan sa Artsidiyosesis/diyosesis. Katungdanan niya ang paggiya ug pagdumala sa mga sesyon alang sa kalingkawasan. Iyang kaakuhan kining mosunod:

a.    Pagbendisyon sa mga sakramentales nga gamitonon.

b.    Pagpadayag sa Santisimo Sakramento[2] ingon man ang paghipos niini[3]

2.    Prayer Leaders

Duha ngadto tulo ka mga layko babaye man o lalaki nga gipili sa eksorsista o natahasan nga maoy mangulo sa mga pag-ampo panahon sa sesyon sa kalingkawasan. Sila gipili pinasikad ning maong mga kinaiya.

a.    Dunay halawom nga kinabuhi sa pagtuo.

b.    Pagkamaampoon.

c.     Masinugtanon sa pagtulon-an sa Simbahan.

d.   Mapaubsanon.

e.    Abli sa kahigayonan nga magkat-on.

f.      Dunay pagmahal sa Sagrada Eyukaristiya ingon man sa pagkumpisal.

g.    Nagpuyo sa tarong nga pagkinabuhi ingon man adunay emosyonal nga kahamtong.

3.    Case Officers

Sila kadtong natahasan aron mohimo og mga pasiunang pakisusi sa mga kliyente nga niduol sa opisina aron magpakitabang. Katungdanan nila kining mosunod:

a.    Paghimo sa interview.

b.    Pakisusi sa kaso ug sa dapit (ocular inspection)

c.     Pagtipig sa mga individual records o files sa mga kliyente.

d.   Ilang hagpaton ang matang sa kaso o mga kaso nga giatubang human makuha ang mga datos aron  maseguro nga mailhan gyud ang hinungdan sa suliran kun problema.

e.    Pagahimoon usab ang follow up interview matag karon ug unya. Ang case officer maoy mohukom uban ang pagkonsulta sa eksorsista ug mga doktor kun nagkinahanglan ba gyud og solemneng eksorsismo o pag-ampo sa kalingkawasan lamang ang gikinahanglan sa pasyente.

f.      Gikinahanglan motambong usab sila kun ugaling mopatawag og tigom ug updating ang Opisina sa Pangalagad alang sa Espirituhanong Kalingkawasan. (Ministry of Liberation). —Padayonon sunod gula