Cebu FC magsagubang og malisud nga tahas

Nagrupo sa lig-ong mga teams sa AFC Champions League Two

CEBU, Philippines — Ang Dynamic Herb Cebu FC nabunlot uban sa lig-ong mga teams sa Group H sa Asian Football Confederation (AFC) Champions League Two.

Girepresentahan sa ilang sporting director nga si Evren Tasci ug team manager nga si Hannah Jayne Wong atol sa Group Stage draw ceremony didto sa InterContinental Kuala Lumpur sa Malaysia ning bag-ohay pa lamang, ang Gentle Giants nagrupo uban sa Jeonbuk Hyundai Motors FC sa South Korea, Selangor FC sa Malaysia, ug Muangthong United FC sa Thailand.

Ang Cebu FC nakaangkon og luna sa ACL Two tungod sa maanindot niining salida sa Philippines Football League (PFL) Season 2024 diin kini nakaposte og 36 puntos gikan sa impresibo nilang 12-2 win--loss record.

Sa miaging tuig, ang Cebu FC midala sab sa bandila sa nasud sa labing una nilang internasyonal nga kampanya pinaagi sa AFC Cup human sila mitapos nga first runner-up sa 2022-2023 PFL season.

Sa maong torneyo, ilang nakasangka ang Phnom Penh Crown FC, Macarthur FC, ug 2022 Myanmar National League champion Shan United.   

Luyo sa pagkamabaynihon ni Ken Murayama, ang Cebu FC mikulit sa una nilang daog sa internasyonal nga bantawan batok sa Shan United, 1-0.

Ning higayona, ang Gentle Giants makigharong batok sa bag-ong panon sa mga international clubs sa Champions League.

Ang labing hait nga makabangga sa Cebu FC mao ang Jeonbuk Hyundai Motors FC nga nakampiyon siyam ka higayon sa K League, ang labing taas nga liga sa football didto sa South Korea.

Nakampiyon sab ang Jeonbuk sa ACl duha ka higayon niadtong 2006 ug 2016.

Nagbarog sab sa ilang dalan ang  Selangor FC nga runner-up sa 2023 Malaysia Super League uig runner-ug Muangthong United FC nga semifinalist sa 2010 AFC  Cup.

Sa ACL Two, ang mga duwa sa group stage ipahigayon ubos sa home-and-away format gikan sa Septimebre ngadto sa Disyembre. Ang top 2 teams matag grupo moabante sa knockout stage.

Ang round of 16 kumbatihan sa Pebrero sunod tuig, ang quarterfinals sa Marso, ang semifinals sa Abril, ug ang finals sa Mayo 2025.