3 dam sa Luzon, nagpakawala na ng tubig
Pinangangambahan na umapaw
MANILA, Philippines — Dahil sa patuloy na pagtaas ng tubig-baha dulot ng habagat, sinimulan nang magbawas ng tubig ang tatlong dam sa Luzon, ayon sa Philippine Atmospheric Geophysical and Astronomical Services Administration (PAGASA) kahapon.
Sa ulat ng PAGASA-Hydrometeorology Division, upang makaiwas sa pag-apaw, nagpakawala ng tubig ang Ipo Dam makaraang isang gate nito ang binuksan sa may gate opening na .30 centimeter.
Umaabot na sa 106 meters ang antas ng tubig ng naturang dam na bahagyang mataas sa 101 meters na normal high water level.
Tig-tatlong gate naman na may gate opening na 1.50 meters ang binuksan sa Ambuklao at Binga Dam para magpakalawa ng tubig.
Nabatid na nasa 7.51 meters ang water elevation sa Ambuklao na halos maabot na ang 7.52 meters na normal high water elevation.
Abot na rin sa 574.58 meters ang water elevation ng Binga Dam at halos pantay na sa 575 meters na normal level nito.
Samantala, tumaas din ang antas ng tubig sa Angat Dam, na nasa 191.70 meters na. Nadagdagan ito ng 3.50 meters kumpara sa 188.20 meters noong Biyernes.
Umangat din ang water level sa La Mesa Dam 79.58 meters, San Roque dam na 257.25 meters, Pantabangan dam na 186.33 meters,Magat dam 172.75 meters at Kaliraya dam. 286.68 meters.
- Latest
