Angelica, atat nang iluwal ang anak

Hindi sinasabi kung kailan manganganak si Angelica Panganiban sa first baby nila ni Gregg Homan at ang lagi lang sinasabi, malapit na siyang manganak. Nasa Manila na nga si Angelica para malapit sa hospital kung saan siya manganganak at nabanggit na pagbalik nila ni Gregg sa Subic, dala na nila ang kanilang baby.

Nasa vlog pala nina Angelica at Gregg ang video kung paano nila inayos at pinaghandaan ang nursery ng baby nila na tinatawag nilang si “Bean.” Ipinakita rin ng dalawa ang mga gamit sa nursery at ang mga regalong natanggap ng baby nila sa ginawang baby shower.

May regalo galing kay Glaiza de Castro, Meryl Soriano, Ketchup Eusebio, at iba pang friends ni Angelica. Pero, walang tatalo sa regalo ni Ryan Bang na Fudgee Barr at mas naloka si Angelica sa kasamang letter ni Ryan na baon daw ‘yun ng baby nina Angelica at Gregg kapag nag-schooling na ito.

Sabi ni Angelica, kapag four years old na ang baby niya, puwede nang mag-school at ang ibig sabihin, hihintayin pa nila ang four years bago makain ang Fudgee Barr. Ang problema, mabilis mag-expire ang pagkain and after four years, inaamag na ito at hindi na makakain.

Robin at Mariel, tumagal ng 12 years ang pagsasama 

May pabirong reklamo ang nakapanood ng reels sa 12th anniversary dinner nina Senator Robin Padilla at Mariel Rodriguez. Sobrang bilis daw ng reels kung saan naka-post at dinner, hindi nakita kung sino ang mga bisita at kasalo ng mag-asawa sa kanilang anniversary dinner.

Ang reklamo naman ng iba, sa bilis ng reels, hindi masyadong natingnan ang handang food, eh marami at masarap pa naman. Gusto sana nilang makita, kaya lang sobrang bilis ng reels.

Anyway, marami ang nagpaabot ng congratulations at wishes sa 12th anniversary nina Robin at Mariel. Matagal na raw pala ang relasyon ng dalawa at ngayon, senador na si Robin, pero si Mariel, hindi pa rin itinitigil ang online food business na Cooking Ina Mo Food Market.

Gabbi, pasok din sa Maria Clara…

Kasama pala sa cast ng Maria Clara at Ibarra si Gabbi Garcia at gagampanan ang role ni Juli na asawa o nobya ng karakter ng older Basilio. Hindi pa nagti-taping si Gabbi dahil wala pang lumalabas na photos na galing sa taping ng historical portal fantasy ng GMA 7 na kasama siya.

Masuwerte si Gabbi dahil katatapos lang ng Love You Stranger nila ni Khalil Ramos, heto at may malaki na naman siyang project na pang-primetime pa rin. Bukod pa sa malalaking Kapuso stars ang kasama sa cast.

Napapansin din ang sunud-sunod na endorsement ni Gabbi at kabilang sa bago niyang endorsement at kare-renew lang niya ng kontrata bilang endorser ng phone, may conditioner pa, may coffee, at may soy milk drink pa.