17-anyos gitabangan og dunggab

CEBU, Philippines - Gumikan sa kasuko sa mag-live-in partner nganong wala iuli ang ilang kwarta nga gipasensiyoan, ilang gidunggab ang menor de edad nga babaye nga ilang gisugo.

Kritikal ang kahimtang sa 17-anyos nga babaye sulod sa Vicente Sotto Memorial Medical Center human tabangi og dunggab sa managkapuyo nga sila si Ariel Lacson ug Michelle Manolo, pulos hingkod ang panuigon.

Matud ni SPO1 Alex Noron sa Cordova Police Station nga gipasakay sa mga suspetsado sa motorsiklo gikan sa Brgy. Poblacion ang biktima ug gidala sa awa-aw nga dapit sa Brgy. Dapitan ug didto ilang gidunggab niadtong Sabado sa buntag.Human nila dunggaba, dali silang misibat. Ang mga nagpuyo sa dapit nga nakamatikod, dali’ng misumbong sa kapolisan.

Ang mirespondeng mga polis na maoy midala sa biktima sa Lapu-Lapu City District Hospital alang sa pasiuna’ng pagtambal ug dali kining gibalhin sa VSMMC.

Gibutyag ni SPO1 Noron nga gisugo sa mag-live-in ang biktima sa pagpasensiyo sa ilang kwarta nga nagkantidad og P200 apan wala na mobalik ang menor de edad hinungdan sa ilang kasuko, nabuhat ang krimen. - /DILT) (BANAT NEWS)