Rehab program sa Madridejos istriktuhon

CEBU, Philippines - Tigumon sa mayor sa Lungsod sa Madridejos sa isla sa Bantayan ang tanang nalambigit sa ilegal nga drugas nga nitahan sa ilang lugar aron hisgutan ang ilang rehabilitation program.

Gipahibawo ni Madridejos Mayor Jay River Dela Fuentes nga ang maong tigum alang sa mga drug surrenderer mahitabo sunod semana kini alang sa pagpahugot sa ilang rehabilitation program human siya nakadawat og taho nga adunay mga nitahan nga wala na moapil sa maong kalihukan.

Gipadayag sa mayor nga iyang istriktuhon ang pagpatuman sa ilang rehabilitation program aron madisiplina ang mga nitahan. Gani magpahigayon sila og surprise drug test ug kun magpositibo gihapon, makadawat sila og disciplinary actions gikan sa lokal nga kagamhanan ug kapolisan.

Sumala pa ni Dela Fuente nga kun adunay polis nga makadakop og mga tawo nga nalambigit sa ilegal nga drugas, iya kining hatagan og premyo gikan sa iyang personal nga bulsa.

Kun molampos sa rehabilitation program ang mga drug surrenderer, aduna silay daghan kaayohan nga madawat sama sa oportunidad sa panarbaho, pagpatambal ug libreng scholarship sa mga bata nga nalambigit sa ilegal nga drugas.

Giangkon sa mayor nga mga gagmay’ng pusher lang ang anaa sa ilang lungsod kaniadto, diin mangumpra sila og drugas sa siyudad.

Si PO3 Orland Alico, team leader sa Madridejos Police Station, nibutyag nga basi sa ilang monitoring, wala nay nalambigit kaayo sa ilegal nga drugas sa ilang lugar ug nagpaabot na lang sila sa CPADAO nga adunay ideklarar nga drug free.

Dugang niini nga aduna silay 539 ka drug surrenderer ug padayon gihapon nilang gi-monitor ang lungsod.

Ang rehiyonal nga director sa PDEA-7 Yogi Ruiz, nitug-an nga dako kaayo og tabang sa kampanya sa ilegal nga drugas ang gihimo ni Mayor Dela Fuente, ilabi na sa paghatag niini og pahalipay sa mga otoridad nga makadakop og mga tawo nga nalambigit sa ilegal nga drugas. (BANAT NEWS)